दृष्टिविहीन बालबालिकाहरुलाई शैक्षिक सामाग्री सहयोग

६ असोज, हेटौँडा । सिद्धान्त अनुसन्धान महाविद्यालय संघ नेपाल मकवानपुर शाखाले १८ जना दृष्टिविहीन बालबालिकाहरुलाई शैक्षिक सामाग्री सहयोग गरेको छ । संघले हेटौँडा उपमहानगरपालिका वडा नम्वर ५ स्थित बालज्योति माध्यामिक विद्यालयका दृष्टिविहिन बालबालिकाहरुलाई विद्यालयमै पुगेर शैक्षिक सामाग्री हस्तान्तरण गरेको हो ।

संघका सदस्य चन्द्रबहादुर सुनारको संयोजकत्वमा कार्यक्रम भएको हो । शैक्षिक सामाग्रीका साथै प्राथमिक उपचार बक्स, जुस, सेनेटरी प्याड लगाएतका सामाग्री मकवानपुरका अग्रज पत्रकार गरिजा अधिकारी र कार्यक्रमका संयोजक सुनारले विद्यालयका प्रधानाध्यापक अर्याललाई हस्तान्तरण गरेका हुन् । कार्यक्रममा बोल्दै विद्यालयका प्रधानाध्यापक अर्यालले सहयोगी संस्थाप्रति आभार व्यक्त गरे । दृष्टीविहिन बालबालिकाहरुको अध्ययनका लागि अन्य सहयोगी हातहरुको पनि आफुले अपेक्षा गरेको बताए ।

त्यसैगरी कार्यक्रमका अतिथि एवं अग्रज पत्रकार गिरिजा अधिकारीले संघले बालबालिकाको अध्ययनको लागि महत्वपूर्ण सहयोग गरेको भन्दै प्रशंसा गरे । दृष्टिविहिन बालबालिकाको सहयोगको लागि आफुले पनि सहयोग जुटाउन प्रयास गर्ने बताए । कार्यक्रमको अन्त्यमा बोल्दै कार्यक्रमका संयोजक सुनारले संघले युवा विचलनमा सुधार ल्याउने कार्यक्रमहरु, नेतृत्व विकासका कार्यक्रमहरु, सार्वजनिक सरसफाई लगाएतका सामाजिक हितका कामहरु विगतमा पनि हुँदै आएको र आगामी दिनमा पनि सामाजिक काममा आफुलाई सहभागि गराउन थप प्रेरणा मिलेको बताए ।

कार्यक्रममा संघका मकवानपुर प्रेस संयोजक बलराम पुडासैनी, संघका सदस्य राजु घलान, एक्का बहादुर घिसिङ्, सुनिता लामा लगायतको उपस्थिति रहेको थियो ।