यति ड्रगमा ‘देखावटी’ अनुगमन, उपभोक्तावादी र पत्रकारको बहिस्कार

सुनिल शिवाकोटी

६ भदौ, हेटौंडा । हेटौंडा–१ राप्तिरोडमा रहेको यति ड्रग हाउसमा भएको ‘देखावटी’ अनुगमनप्रति असन्तुष्टि व्यक्त गर्दै उपभोक्तावादी संस्था र पत्रकारले अनुगमन बहिस्कार गरेका छन् ।
अनुगमनका क्रममा यति ड्रग हाउसमा मानविकी र व्यवस्थापन पढेका व्यक्तिहरुले औषधी विक्रि गरिरहेको र चिकित्सक राखेर विरामी जाँच समेत गरेको पाईएको थियो । घरेलु तथा साना उद्योग कार्यालय हेटौँडाका प्रमुख नारायण प्रसाद खनालको नेतृत्वमा भएको अनुगमनमा खनालले अनुगमनका क्रममा यति ड्रगमा त्रुटी भेटिएपनि कुनै कानूनी प्रक्रिया नचालेको भन्दै उनीहरुले बहिष्कार गरेका हुन् ।
औषधी विक्रिका लागि फार्मेसी पढेका व्यक्तिहरु राख्नुपर्ने र पोलिक्लिनिक दर्ता विना विरामी जाँच गर्न नपाईने व्यवस्था भएपनि खनालले यति ड्रग विरुद्ध कुनै कानूनी कारवाही नगरेको उपभोक्तावादी र पत्रकारहरुको भनाई छ । यति ड्रगमा ‘देखावटी’ खालको मात्रै अनुगमन भएकोले आफुहरुले बहिस्कार गरेको उपभोक्तावादीहरुले प्रतिक्रिया दिए । गलत गर्नेलाई कारवाही नगर्ने हो भने अनुगमनको औचित्य नरहने उनीहरुको भनाई छ ।
अनुगमनमा जिल्ला प्रशासन कार्यालय मकवानपुरका प्रतिनिधि समेत थिएनन् । अनुगमनमा खनालको नेतृत्वमा स्वास्थ्य कार्यालय मकवानपुरका ल्याब एसिस्टेन्ट साहरुख हुसेन, उपभोक्ता हित संरक्षण मञ्चका बासु खतिवडा, उपभोक्ता मञ्च मकवानपुरका कपिल अर्यालसहित पत्रकारहरुको सहभागिता रहेको थियो ।