रेडियो मकवानपुर र टिम टिभि मिडिया कपको सेमिफाइनलमा 

९ असोज, हेटौंडा । रेडियो सन्देश १०६.९ मेगाहर्जको वार्षिकात्सवको अवसरमा हेटौंडामा भएको जिल्लास्तरीय मिडिया कप फुटसल प्रतियोगिता अन्तर्गत विहिबार ५ खेल सम्पन्न भएका छन् ।
बिहिबार बिहान भएको पहिलो खेलमा रेडियो मकवानपुर बिजयी हुँदै सेमिफाइनल प्रवेश गरेको छ । रेडियो मकवानपुरले पत्रकार महासंघ मकवानपुरलाई ६–१ ले गोल अन्तरले पराजित गरेको हो । 
रेडियो मकवानपुरको जितका लागी गणेश दर्पण अधिकारी, कुमार अधिकारी विजय पौडेल, इमान घलान र विक्रम बानियाँले गोल गरे । यस्तै महासंघका तर्फबाट रामशरण दुलालले सान्त्वना एक गोल फर्काए ।
यसैगरी विहिबारनै भएको प्रतियोगिताको दोश्रो खेलमा रेडियो सरोबर टाईब्रेकरमा विजयी भएको छ । रेडियो सरोबरले रेडियो बुलेटिनलाई टाईब्रेकरमा हराएको हो । निर्धारित समयमा दुबै तर्फबाट दुई दुई गोलको बराबरी भएपछि खेल टाईब्रेकरमा पुगेको थियो ।
यस्तै तेश्रो खेलमा रेडियो पालुङले थाहा सञ्चारलाई ४–२ गोलअन्तरले पराजित गरेको छ । बिहिबारनै भएको अर्को खेलमा टिम टेलिभिजन बिजयी भएको छ । टिम टेलिभिजनले हेटौंडा एफएमलाई ९–२ को फराकिलो गोलअन्तरले पराजित गरेको हो । टेलिभिजनको तर्फबाट मनिष खड्काले दोहोर ह्याट्रिक गर्दा पुष्पराज अधिकारीले २ र बालकृष्ण अधिकारीले १ गोल गरे । 
यसैगरी विहिबारको अन्तिम खेलमा रेडियो सरोबर आयोजक रेडियो सन्देशलाई हराउँदै सेमिफाइनलमा पुगेको छ । सरोवरले सन्देशलाई २–१ को गोल अन्तरले पराजित गरेको हो । 
यसअघि विहिबार बिहान फुटसल प्रतियोगिताको उद्घाटको क्रममा नेपाल पत्रकार महासंघ मकवानपुर र मकवानपुरका राजनितिककर्मी विच मैत्रिपुर्ण फुटसल प्रतियोगिता भएको थियो । उक्त खेलमा पत्रकारको टिमले राजनीतिककर्मी लाई २–१ गोल अन्तरले पराजित गर्यो । पत्रकारका तर्फबाट महासंघका उपाध्यक्ष कुमार अधिकारी पोष्टराज र सचिव गणेश दर्पण अधिकारीले गोल गरे भने राजनितिक दलका तर्फबाट नेपाली कांग्रेसका जिल्ला सदस्य हरि वाग्लेले गोल गरेका थिए ।