नेपाल क्रिकेट संघ क्यानको अध्यक्षमा चन्द निर्वाचित

११ असोज, हेटौंडा । नेपाल क्रिकेट संघ (क्यान) को अध्यक्षमा चतुरबहादुर चन्द निर्वाचित भएका छन् । शनिबार सम्पन्न विशेष साधारण सभाबाट चन्द अध्यक्षमा निर्वाचित भएका हुन् ।
अन्तराष्ट्रिय क्रिकेट परिषद (आईसीसी) ले गठन गरेको स्वतन्त्र कमिटिको समन्वयमा भएको निर्वाचनमा अर्का अध्यक्षका प्रत्यासी विनयराज पाण्डेलाई हराउँदै चन्द निर्वाचित भएका हुन् । ५९ जना प्रतिनिधि सहभागि मतदानमा चन्दले ४४ मत प्राप्त गर्दा पाण्डेले १५ मत प्राप्त गरे ।
१७ सदस्यीय नयाँ कार्यसमितीका लागि शनिबार भएको निर्वाचनमा अन्य पदाधिकारीमा समेत चन्द प्यानलले बहुमत प्राप्त गरेको छ । 
संघको उपाध्यक्षमा चन्द प्यानलका राजुबाबु श्रेष्ठ, सचिवमा चन्द प्यानलका अशोकनाथ प्याकुरेल,  कोषाध्यक्षमा चन्द प्यानलकै रोशन कुमार सिंह विजयी भए ।
यस्तै प्रदेश सदस्यतर्फ प्रदेश १ बाट कैलाश विष्ट, प्रदेश २ बाट दाउद अन्सारी, प्रदेश ४ बाट ऋषिराम गौतम, प्रदेश ५ बाट प्रसान्त बिक्रम मल्ल, प्रदेश ६ बाट पदम बहादुर खड्का र प्रदेश ७ बाट बिक्रम बिष्ट निर्विरोध निर्वाचित भएका छन् ।
यसैगरी महिला सदस्यमा जयन्ती भट्ट निर्विरोध निर्वाचित भइन् । खुल्ला सदस्यमा दुर्गा राज पाठक, बिरेन्द्र वहादुर चन्द, माधव कुमार कर्माचार्य, संजय राज सिंह र करन महोत्रा क्षेत्री निर्वाचित भएका छन् ।
सरकारी हस्तक्षेप अवैधानिक निर्वाचन गराएको भन्दै यस अघि २०७३ सालमा आईसीसीले नेपाल क्रिकेट संघलाई निलम्बन गरेको थियो । त्यो बेला पनि चतुर बहादुर चन्द नै अध्यक्ष थिए ।
नेपाली क्रिकेट विवाद समाधानका लागि आईसीसीले बनाएको सल्लाहकार समितिले क्यानको विधान तयार गरेको थियो ।