हटिया स्पोर्टसलाई हराउँदै डाँफेले जित्यो जिल्ला लिग 

१२ असोज, हेटौंडा । जिल्ला फुटबल संघ मकवानपुरको आयोजनामा सम्पन्न दानबहादुर श्रेष्ठ स्मृति जिल्ला लिग फुटबल प्रतियोगिताको उपाधि न्यू डाँफे क्लबले जितेको छ ।
शनिबार सम्पन्न उपाधि भिडन्तमा हटिया स्पोर्टस् एकेडेमीलाई टाइब्रेकरमा ४–१ गोल अन्तरले हराउँदै डाँफेले उपाधि जितेको हो । उसले उपाधि सहित एकलाख रुपैयाँ प्राप्त गरेको छ । 
शविनार सम्पन्न फाइनल खेलको निर्धारित समयमा दुवै तर्फबाट कुनै गोल हुन नसकेपछि खेल टाईब्रेकरमा धकेलिएको थियो ।  
टाइब्रेकरमा डाँफेको तर्फबाट अरुण बल, फत्तेमान घले, विक्रम भोलन र विवेक रुम्बाले गोल गरे भने हटियाको तर्फबाट राजेश पाण्डेले मात्र गोल गरे । 
हटियाका आयुर घलानको प्रहार डाँफेका गोलरक्षक अनिल लोले रोकेका थिए भने अनिष लुइँटेलको प्रहार बारमा लागेर फर्किएको थियो । 
प्रतियोगिताको उपविजेता बनेको हटियाले ५० हजारमा चित्त बुझाएको छ । प्रतियोगिताको सर्वोत्कृष्ट खेलाडी हटियाका आयुर घलान घोषित भए उनले नगद १० हजार सहित ट्रफि प्राप्त गरे । 
यस्तै प्रतियोगिताको उत्कृष्ट डिफेन्डर हटियाका राजेश पाण्डे, उत्कृष्ट फरवार्ड डाँफेका विशाल भोलन, उत्कृष्ट मिडफिल्डर डाँफेकै फत्तेमान घले र उत्कृष्ट गोलरक्षक डाँफेकै अनिल लो घोषित भए । विधागत उत्कृष्ट भएका खेलाडीहरुले जनही ५ हजारसहित ट्रफी प्राप्त गरे ।