साफ अन्डर १८ को उपाधि भारतले जित्यो 

१२ असोज, हेटौंडा । नेपालमा सम्पन्न साफ अन्डर–१८ को उपाधि भारतले जितेको छ । काठमाडांैको हलचोकस्थित एपिएफ क्लबको मैदानमा आइतबार सम्पन्न फाइनल खेलमा भारतले बंगलादेशलाई २–१ ले पराजित गर्दै उपाधि जितेको हो । 
यस अघि सम्पन्न दुई संस्करणमा नेपालले उपाधि जितेको थियो । तेस्रो संस्करणको उपाधि जितेसँगै भारतले साफ अन्डर–१८ च्याम्पियनसिपमा उपाधि जित्ने नयाँ टोली बनेको छ ।
भारतलाई जित दिलाउन बिक्रम प्रताप सिंह र रबि बहादुर रानाले एक एक गोल गरे । बंगलादेशका एसिन अर्फातीले एक गोल फर्काए । 
निकै प्रतिस्पर्धात्मक बनेको फाइनल खेलको पहिलो हाफमै ३ खेलाडीले रातो कार्ड सामना गर्दैै मैदान बाहिरिएका थिए ।
खेलको २२ औं मिनेटमा भारत र बंगलादेशका एक÷एक खेलाडी झगडामा उत्रिएपछि रेफ्रिले उनीहरुलाई रातो कार्डको दर्शन गराउँदै मैदान बाहिर पठाएका थिए । भारतका गुर्किरात सिंह र बंगलादेशका मोहमद रिडोयलाई दोस्रो पहेलो कार्ड दिँदै मैदानबाट बाहिर पठाएका हुन्  । 
दुई खेलाडीले रातो कार्डको सामना गर्दै मैदान बाहिरिँदा ९ खेलाडीमा सिमित बनेको बंगलादेश विरुद्ध कम खेलाडी भएको फाइदा भारतले इन्जुरी समयमा मात्र लिन सफल भयो । थपिएको समयमा भरत रानाले गोल गर्दै टोलीको जित लाई निश्चित गरे । 
प्रतियोगिता अन्तर्गत आइतबारै तेस्रो स्थानका लागि अखिल नेपाल फुटबल संघ (एन्फा) मुख्यालयमा भएको प्रतिस्पर्धामा माल्दिभ्सले भुटानलाई १–० ले पराजित गरेको छ । माल्दिभ्सको जितमा इब्राहिम इमरानले ७५ औं मिनेटमा गरेको गोल नै निर्णायक बन्यो ।