हेटौँडामा ढुंगा र अश्रुग्याँस प्रहार, दुई दर्जन घाइते (तस्विरसहित)

६ माघ हेटौडा । प्रर्दशनकारी र प्रहरीको झडपका कारण मकवानपुरको सदरमुकाम हेटौडा विहिबार दिनभर तनावग्रस्त बनेको छ । डिभिजन सडक कार्यालय हेटौडाले सडक विस्तार गर्ने क्रममा झडप भएपछि बजार तनावग्रस्त बनेको हो ।
सडक कार्यालयले राप्तिरोडमा संरचना भत्काउन एक्साभेटर प्रयोग गरेपछि घरधनी र व्यवसायीले प्रदर्शन गरेका थिए । प्रर्दशन नियन्त्रणका लागि परिचालन भएको प्रहरीमाथि प्रदर्शनकारीले ढुंगा प्रहार गरेका थिए । ठूलो संख्यामा जम्मा भएका प्रदर्शनकारीले ढुंगा प्रहार गर्न थालेपछि जवाफमा प्रहरीले अश्रुग्याँस प्रहार गरेको थियो । प्रर्दशनकारीले राप्तिरोड र कान्तिराजपथमा टायर समेत बालेका थिए । मकवानपुरका प्रहरी नायव उपरीक्षक बामदेव गौतम नेतृत्वको प्रहरी टोली प्रर्दशनकारीलाई बुद्धचोकबाट पछि हटाउन परिचालन भएको थियो । चोकमा रहेका प्रहरीलाई प्रर्दशनकारीले चारैतिरबाट ढुंगा प्रहार भएको थियो ।
प्रहरी र प्रर्दशनकारीबीच झडप हुँदा दुबै पक्षका गरी करिव दुई दर्जन घाइते भएका छन् । झडपका कारण हेटौडाको राप्तिरोड, मेनरोड, कान्तिराजपथ, स्कूलरोड, टिसिएन, त्रिभुवनराजपथ क्षेत्रका पसल बन्द भएका थिए । डिभिजन सडक कार्यालयले तीन दिनदेखि पूर्वपश्चिम राजमार्ग अन्तरगत हेटौडामा २५ मिटर क्षेत्रमा बनेका संरचना भत्काउने कामलाई तिब्रता दिईरहेको छ ।
१५ दिन समय दिने डिभिजन सडक कार्यालयको सहमति विपरित एक्साभेटर प्रयोग हुन थालेपछि आक्रोश बढेको मकवानपुर उद्योग बाणिज्य संघका अध्यक्ष महेन्द्र राउतले बताए ।
विहान बजार खुलेको खबर फैलिएपछि किनमेलका लागि बजार आईपुगेका सर्वसाधारण एक्कासी झडप हुँदा ढुंगा र अश्रु ग्याँसमा परेका थिए ।

तस्विर : सुजन विडारी