चौकीटोलको संयुक्त काउन्टर हट्ने, यस्तो छ व्यवस्था

File Photo

१३ असोज, हेटौँडा । हेटौँडा–१ चौकीटोलमा रहेको संयुक्त सुमो काउन्टर हट्ने भएको छ । मकवानपुरका प्रमुख जिल्ला अधिकारीसहितको सर्वपक्षीय बैठकले यस्तो निर्णय गरेको हो ।
संयुक्त काउन्टरको सट्टा सबै सुमो कम्पनीहरुले आफ्नो काउन्टर सोही स्थानबाट संचालनमा ल्याउने भएका छन् । सुमो कम्पनीहरुले बजारमा राखेका काउन्टर बन्द गरी चौकीटोलमै छुट्टाछुट्टै काउन्टर संचालन गर्ने सहमति भएको छ ।
चाडपर्वलाई लक्षित ट्राफिक व्यवस्थापन र यात्रुहरुलाई सहज यात्राका लागि बजारका विभिन्न क्षेत्रमा छरिएर रहेका सुमोका काउन्टरहरु अब चौकीटोलमै राख्ने व्यवस्था गर्न लागेको मकवानपुरका प्रमुख जिल्ला अधिकारी प्रेमराज जोशीले बताए । बैठकमा प्रजिअ जोशीले ट्राफिक तथा उपमहानगरपालिकासंग समन्वय गरी  तोकेको स्थानमा मात्रै पार्किङको व्यावस्था गरिने बताएका छन् । अटो र इ–रिक्सालाई पनि व्यवस्थित गरिने बैठकमा जानकारी दिए ।
कार्यक्रममा जिल्ला ट्राफिक प्रहरी प्रमुख हरी बिष्णु ढकालले बढ्दो ट्राफिक चाप व्यवस्थापनबारे कार्यपत्र प्रस्तुत गरेका थिए । बैठकमा हेटौडा उपमहानगरपालिकाका प्रमुख हरी बहादुर महत, यातायात व्यवसायी संघका प्रतिनिधिहरु, जनप्रतिनिधि लगायतको उपस्थिती रहेको थियो ।