राम्रो काम नगरे प्रतिगमन रोक्न सकिंदैन : श्रेष्ठ

१५ असोज, हेटौँडा । नेपाल कम्युनिष्ट पार्टी (नेकपा) का प्रवक्ता नारायणकाजी श्रेष्ठले अहिले प्रतिगमनकारीहरु सल्बलाएको बताएका छन् ।
हेटौँडामा रेडियो सन्देशले गरेको अन्तरक्रिया कार्यक्रममा बोल्दै प्रवक्ता श्रेष्ठले अहिले विभिन्न बहनामा प्रतिगमनकारीहरु सल्वलाएको बताउँदै अहिले नै प्रतिगमनको खतरा भने नरहेको दावि गरे । उनले नेकपा, सरकार र लोकतान्त्रिक पार्टीहरुले ठिक काम गरे कुनै तागतले चाहेर राजतन्त्र स्थापना गर्ने वा निरंकुशतन्त्र स्थापना गर्ने सम्भावना नरहेको बताए । तर ठिक काम गर्न नसके जति चिच्याएर सरापे पनि प्रतिगमनलाई रोक्न नसकिने उनको भनाई छ । 
प्रवक्ता श्रेष्ठले राजनैतिक व्यवस्थाप्रति जनतामा निरासा पैदा हुन नदिन सत्तापक्ष र प्रतिपक्षले विकासको एजेण्डामा एकता कायम गरेर अघि बढ्नुपर्नेमा जोड दिए । समृद्धिको अभियानमा सबैको साझा सहमति आवश्यक रहेको भन्दै उनले सत्तापक्षले प्रतिपक्षलाई दमन गर्ने र प्रतिपक्षले सत्तापक्षको विरोध गर्ने प्रवृत्ति छोड्नु जरुरी रहेको बताए । 
कार्यक्रममा न्यूनतम पारिश्रमिक निधारण समितिका अध्यक्ष गंगाधर पराजुली, नेपाल पत्रकार महासंघका ३ नम्बर प्रदेश अध्यक्ष प्रताप विष्ट लगायतले मन्तव्य व्यक्त गरेका थिए ।