टासी हिसे गुम्बामा गरिएको मौन ब्रत सम्पन्न

२० असोज, हेटौंडा । प्रत्येक वर्ष गरिदै आईरहेको ङयुङने मौन ब्रत हेटौडा २ स्वयम्बु डाँडामा रहेको टासी हिसे गुम्बामा सोमबार सम्पन्न भएको छ । 
गत १७ गते शुक्रबारदेखि धर्मगुरु लोपेन निमा तामाङको नेतृत्वमा शुरु भएको तीन दिने ङयुङने मौन ब्रत सोमबार सम्पन्न भएको हो । 
दशैका बेला बली दिइएका विभिन्न पशुपन्छीहरुको आत्माको चीर शान्तिका लागी फापा चेङरेसी (आर्य अवातालोकेश्वर) को बन्दना गर्दै ङयुङने मौन ब्रत गरिएको हो । यसबाट अकालमा मारिएका प्राणीहरुको उद्धार, मुक्ति हुन्छ भन्ने विश्वास गरिन्छ । 
बौद्धधर्म अनुसार यसरी एकपटक निराहार मौन ब्रत बस्दा ४० कल्पसम्मका क्लेश(पापकर्म) कट्टी भइ मानव जीवनमा जन्म हुन्छ भन्ने विश्वास छ । 
ङयुङने मौन ब्रत अन्तर्गत बसिने ब्रतमा बौद्ध धर्मावलम्बी तामाङ, गुरुङ, शेर्पा, थकाली एवं हिमाली समुदायहरु दशैंका बेला तीन दिने ङयुङने मौन ब्रत बस्ने गर्दछन् । 
ब्रतको लागि मकवानपुर जिल्ला सहित ताप्लेजुङ, काभ्रे, लुम्बिनी चितवन लयगतका स्थानबाट ६४ जना लामा, आनी, ज्योमो, ब्रतालु उपासक, उपासिकाहरुको सहभागिता रहेको गुम्बाको ब्यबस्थापन समितिको अध्यक्ष कालु घलानले जानकारी दिए ।
३ दिने मौन ब्रत गत १७ गते शुक्रबार साँझ जम्मा, १८ गते सोक्छ्योङ (एक छाके खाना), १९ गते कुक्प्पा (निराहार मौन ब्रत), २० गते आज सोमबार पुजापाठ संगै गुरुबाट वाङ (अभिषेक) गरि सबैलाई खादा ओडाई समापन भएको गरिएको छ । 
यस्तै, आज नै मकवानपुरको विभिन्न गुम्बामाहरुमा पनि ङयुङने मौन ब्रत सम्पन्न भएको छ ।