मकवानपुर प्रहरी दशैंमा शान्तिसुरक्षा कायम गर्न सफलः प्रहरी उपरीक्षक सिंह

२२असोज,हेटौंडा।नेपालीहरुको माहान चाड विजयादशमीको टिकाको दिन सम्म मकवानपुरमा कुनै अप्रिय घटना नभएको मकवानपुर प्रहरी प्रमुख प्रहरी उपरीक्षक मुकेश कुमार सिंहले बताएका छन् ।

प्रष्ट खबरसंग कुरा गर्दै उपरीक्षक सिंहले घटस्थापना देखि टिकको दिनसम्म जिल्लामा छिटपुटका घटना बाहेक कुनै अप्रिय घटना नभएको बताएका हुन् । चाडपर्वलाई लक्षीत गरी जिल्ला प्रहरी कार्यालय मकवानपुरले राजमार्ग र नगर सुरक्षा योजना अनुसार गस्ती गरिरहेको उपरीक्षक सिंहले बताए ।

प्रहरी उपरिक्षक सिंहले नगर सुरक्षा योजना अनुसार नै पैदल, मोवाईल गस्ती, साइकल गस्ति परिचालन गरिएकाले कुनैपनि खालका अप्रिय घटना नभएको दावी गरे । चाडपर्वको बेला राजमार्गमा हुनसक्ने लुटपाटका घटना नियन्त्रण गर्न राजमार्गमा रात्रीकालीन गस्तीलाई विशेष प्राथमिकतामा राखीएको मकवानपुरका प्रहरी उपरिक्षक सिंहले बताए । 

मकवानपुरमा पर्ने पुर्वपश्चिम राजमार्गमाको सिमाना चुरियामाई देखी लोथरसम्म रात्रिबसहरुमा हतीयार सहीतका सुरक्षाकर्मी परिचालन गरिएको पनि उपरिक्षक सिंहले जानकारी दिए । 

त्यसैगरी जिल्ला ट्राफिक प्रहरी कार्यालय मकवानपुरका प्रहरी प्रमुख प्रहरी निरीक्षक हरि बिष्णु ढकालले दशैं अवधिमा कुनै ठुला दुर्घटना नभएको बताए । प्रत्येक दिन सरप्राइज चेकिङ्ग र चाडपर्व लक्षित यात्रु सहायता कक्ष स्थापना गरि यात्रुलाइ सहजता प्रदान गरेकोले सवारी चापलाइ नियन्त्रण गर्न सफल भएको निरीक्षक ढकालले बताए ।