शान्ति समाजद्वारा दुई पुरस्कार स्थापना

२७ असोज, काठमाडौं । मानव अधिकार तथा शान्ति समाजले दुईवटा पुरस्कार स्थापना गरेको छ । स्व.कृष्णकुमारी दाहाल शान्ति श्रष्टा सम्मान र स्वर्गीय राधादेवी दाहाल सद्भाव श्रष्टा सम्मान गरी दुईवटा पुरस्कार स्थापना गरेको हो ।
श्रष्टा सम्मान पुरस्कारअन्तर्गत प्रत्यक वर्ष साहित्यका विभिन्न विधामा योगदान गरेका दुईजना श्रष्टा (एक महिला र एक पुरुष) लाई जनही २० हजार नगद र सम्मानपत्र प्रदान गरिने खबर नेपाल समाचारपत्रमा छ ।
उक्त पुरस्कार स्थापनार्थ अक्षय कोषका लागि स्व। दाहाल द्वयका पनातिनी तथा नातिनीहरू अनुजा थापा, अनुपमा पाण्डे र अपूर्वा शर्माले ३ लाख शान्ति समाजलाई प्रदान गर्नुभएको छ । कृष्णकुमारी दाहाल शान्ति श्रष्टा सम्मान र राधादेवी दाहाल सद्भाव श्रष्टा सम्मान हरेक वर्ष महाकवि लक्ष्मीप्रसाद देवकोटा जन्मजयन्तीका अवसरमा प्रदान गरिने समाजले जनाएको छ ।
पुरस्कृत व्यक्तित्व छनोटका लागि शान्ति समाज केन्द्रीय कार्य समितिका सभापति उत्तम पुडासैनीको संयोजकत्वमा सल्लाहकार होमकान्त चौलागाईं, डा। गंगाधर अधिकारी, वरिष्ठ उपसभापति गोविन्द खनाल, उपसभापतिद्वय विष्णुप्रसाद चापागाईं, रेनुका पौडेल र महासचिव सुशिल बस्नेत सम्मिलित छनोट समिति गठन गरिएको छ ।