आन्दोलन गर्ने सामुदायिक वनको चेतावनी

२ कात्तिक, हेटौंडा । तीनै तहको सरकारले कर लगाउँदा आफुहरु मारमा परेको भन्दै सामुदायिक वन उपभोक्ता महासंघले आन्दोलन गर्ने चेतावनी दिएको छ । 
शनिबार हेटौंडामा पत्रकार सम्मेलनको आयोजना गर्दै महासंघ मकवानपुरले मंसिर २ गतेसम्म आफूहरुको माग सम्बोधन नभए आन्दोलन गर्ने चेतावनी दिएको हो । 
सामुदायिक बनमा राज्यका तिनै तहले छुट्टा छुट्टै गरि तेहेरो कर लागु गरि उपभोक्ता समितिहरुलाई मर्कामा पारेको उनीहरको आरोप छ ।
स्थानीय, प्रदेश र संघीय सरकारबाट तेहेरो करको मारमा सामुदायिक वन परेको भन्दै महासंघ मकवानपुरका अध्यक्ष साधुराम चौलागाईंले एक महिना भित्र उक्त करको प्रावधान नहटाए कडा आन्दोलन गर्ने चेतावनी दिए । 
सरकारले केन्द्रबाटै संघीय सञ्चित कोषका लागि १५ प्रतिशत र १३ प्रतिशत काठमा १३ प्रतिशत मुल्य अभिवृद्धि कर लिने गरेकोमा संघीयता लागु भएसँगै सँघ, प्रदेश तथा स्थानीय सरकारले विभिन्न शिर्षकमा गरि ७३ प्रतिशत कर लगाउने नियमप्रति महासँघले असहमति जनाएको हो  । 
सामुदायिक बनमा हालसम्म लगाउदै आएका वन पैदावर शुल्क र नयाँ प्रस्ताव गरिएका सबै तहका बन पैदावर शुल्कहरु हटाउन महासँघले अपिल गरेको छ । 
पत्रकार सम्मेलनमा सामुदायिक बन उपभोक्ता महासँघ प्रदेश नम्बर तीनका सदस्य रामहरि चौलागाई, जिल्ला अध्यक्ष साधुराम चौलागाई लगायत विभिन्न सामुदायिक बन उपभोक्ता समितिहरुको उपस्थिति रहेको थियो ।