ज्याकेट भित्र ४ किलो गाँजा,२ जना पक्राउ

५ कात्तिक, हेटौंडा। मकवानपुर प्रहरीले ज्याकेट भित्र लुकाइ छिपाई ल्याएको ४ किलो लागुऔषध गाँजा सहित दुई जनालाई पक्राउ गरेको छ।

मकवानपुर प्रहरी  पुर्व पश्चिम राजमार्ग अन्तर्गत हेटौंडा १५ रातोमाटोबाट ४ किलो लागुऔषध गाँजा सहित दुई जनालाई पक्राउ गरेको हो। मंगलबार जिल्ला प्रहरी कार्यालय मकवानपुरले पत्रकार सम्मेलन गर्दै यस बारेमा जानकारी गराएको हो।

ईलाका प्रहरी कार्यालय पशुपतिनगरबाट प्रहरी सहायक निरीक्षक महानन्द प्रसाद कुर्मीको कमाण्डमा खटि गएको प्रहरी टोलीले हेटौडाबाट विरगंज तर्फ जाँदै गरेको ना ५५ प ६०२५ नम्बरको मोटरसाइकललाई रोकि चेकजाँच गर्दा लागुऔषध गाँजा सहित २ जनालाई पक्राउ गरेको हो। 

प्रहरीले मोटरसाइकल पछाडी बस्ने पर्सा बहुद्रामाई नगरपालिका ३  बस्ने २६ बर्षिय असलम देवानले कपडाको ज्याकेट बनाइ भोटो भित्र गाँजा राखि ल्याएको अवस्थामा पक्राउ गरिएको मकवानपुर प्रहरी प्रवक्ता प्रहरी नायब उपरीक्षक यज्ञ प्रसाद भट्टराईले पत्रकार सम्मेलनमा  बताएका छन्। 

प्रहरीले देवान सहित मोटरसाइकल चालक सोहि नगरपालिका १ बस्ने ३८ बर्षीय शम्भु साह कलवार लाइ पनि पक्राउ गरेको प्रहरी प्रवक्ता प्रहरी नायब उपरीक्षक भट्टराईले बताएका छन्। पक्राउ परेका दुई जनालाई  जिल्ला प्रहरी कार्यालय मकवानपुरमा राखिएको र उनिहरू माथि आवश्यक अनुसन्धान भइरहेको जनाइएको छ।