दीपावली र नेपाल संवतको अवसरमा शुभकामना 

१२ कार्तिक, हेटौंडा । राष्ट्रपति, उपराष्ट्रपति, प्रधानमन्त्री र दलका शीर्ष नेताले दीपावली एवं नयाँ वर्ष नेपाल संवत ११४० को अवसरमा शुभकामना व्यक्त गरेका छन् ।
शुभकामना दिँदै राष्ट्रपति विद्यादेवी भण्डारीले नेपालको मौलिक संवतको रूपमा रहेको नेपाल संवतले सबै नेपालीमा सहिष्णुता, भाइचारा र आपसी सद्भाव बढाउने विश्वास गरेकी छिन् ।
यस्तैगरी दीपावली र नेपाल संवतको अवसरमा उपराष्ट्रपति नन्दबहादुर पुनले पनि शुभकामना दिएका छन् । उनले आफनो शुभकामना शन्देसमा उज्यालो र उल्लासको पर्वको रूपमा मनाइने दीपावलीलाई स्वागत गरेर हर्षोल्लासका साथ मनाइँदै गर्दा नेपालको मौलिक संवत् नेपाल संवतको नव वर्ष ११४० को सुखद् प्रारम्भ भएको अवसरमा विविधतायुक्त धर्म संस्कृतिले राष्ट्रिय एकतालाई मजबुत बनाएको उल्लेख गरेका छन् ।
यस्तै प्रधानमन्त्री केपी शर्मा ओलीले नेपाल संवतले नेपालीलाई एकताबद्ध हुन प्रेरणा प्रदान गर्ने उल्लेख गर्दै शुभकामना सन्देशमा नेपाल संवत् मौलिक संवत् भएको, नेपालबाट प्रचलनमा ल्याइएको र परोपकारका कामबाट शुरु गरिएकोले यसको जगेर्नामा सबै नेपाली जुट्नु पर्ने बताएका छन् । 
यसैगरी नेपाली कांग्रेसका सभापति शेरबहादुर देउवाले पनि अन्धकार विनास गर्ने उज्यालोको चाड तिहारले नेपालको अभिशापका रूपमा रहेका सबैखाले अँध्यारोमाथि विजय पाउने प्रेरणा प्रदान गर्न सकोस् भन्ने शुभकामना व्यक्त गरेका छन् ।
यस्तै सभापति देउवाले नेपाल संवत् ११४० को पनि शुभकामना दिदै नेपालीहरुमा परोपकारीको भावना विकास गर्न नेपाल संवत पथप्रदर्शक बनोस भन्ने उल्लेख गरेका छन् । फोटोः गुगल