यसरी पक्रियो प्रहरीले हेटौँडामा एसिड प्रहारका अभियुक्तलाई (तस्विर)

१५ कार्तिक, हेटौंडा । हेटौँडाकी विन्दबिासिनी कंसाकारलाई एसिड प्रहार गरी फरार रहेका एक अभियुक्तलाई प्रहरीले पक्राउ गरी शुक्रबार सार्वजनिक गरेको छ । भारतीय नागरिक भारत महाराजगंज अमरपुर्वन वडा नम्बर ६ का राज भनिने दिलिपराज केशरीलाई जिल्ला प्रहरी कार्यालय मकवानपुरले शुक्रबार पत्रकार सम्मेलन गरी सार्वजनिक गरेको हो ।
हेटौँडामा बस्दै आएका केशरीले कंसाकारलाई २०७० साल बैशाख ९ गते पसलमै गएर एसिड प्रहार गरी फरार भएका थिए । आफुले राखेको विवाहको प्रस्ताव अस्विकार गरेको भन्दै केशरीले कंसाकारलाई एसिड प्रहार गरेका थिए । अनुहारमा एसिड प्रहार भएपछि कष्ट व्यहोर्दै उनले विभिन्न अस्तालमा उपचार गर्नु परेको थियो । दोषिलाई कारवाहीको माग गर्दै त्यति बेला र्याली समेत आयोजना भएको थियो । मकवानपुरका प्रहरी नायव उपरीक्षक यज्ञप्रसाद भट्टराईले पत्रकार सम्मेलन गरी केशरीलाई सार्वजनिक गरेका थिए ।
केशरीलाई प्रहरी महानिरीक्षक सर्वेन्द्र खनालको निर्देशनमा बाराका प्रहरी नायव निरीक्षक सागर शम्सेर जवरासहितको टोलीले बाराको जीतपुर सिमरा उपमहानगरपालिका भलोहीमा लुकिछिपि बसेको अवस्थामा विहिबार राति ९ बजे पक्राउ गरेको पत्रकार सम्मेलनमा जानकारी दिईएको छ । ज्यान मार्ने उद्योग मुद्धामा फरार रहेका उनलाई ५ बर्षदेखि १२ बर्ष कैद हुने व्यवस्था छ ।
उपचारमा खर्च भएको रकम पीडकबाट भराउनुपर्छ : कंसाकार
एसिड प्रहारबाट पीडित विन्दबासिनी कंसाकारले पत्रकार सम्मेलनमा पिडक पक्राउ परेको प्रति सकारात्मक प्रतिक्रिया दिएकी छिन् । उनले प्रहरीको कार्यको प्रशंसा समेत गरिन् । उनले घटनाको दोषि पक्राउ परेकोमा खुशी व्यक्त गर्दै कानूनी कारवाहीको माग गरेकी छिन् । उनले आफ्नो उपचारमा भारतीय रुपैंया ८० लाख रुपैँया खर्च भएको भन्दै पिडकबाट रकम भराउन माग गरिन् ।