समयमै रंगशाला मर्मत नहुँदा नेपाल–कुवेतविचको खेल भुटानमा हुने

२२ कार्तिक, हेटौंडा । नेपाल र कुवेतबीच दशरथ रंगशालामा हुने भनिएको विश्वकप छनोटको फुटबल खेल भुटानमा हुने भएको छ । 
एसियाली फुटबल महासंघ (एएफसी)का प्रतियोगिता समितिका प्रतिनिधि देङ सिओ लोङले रंगशालाको निरीक्षण गरी बुझाएको प्रतिवेदनपछि फिफा र एएफसीले नेपालको दशरथ रंगशालामा हुने भनिएको खेलको स्थान परिवर्तन गरिएको हो । 
देङ सिओ लोङले बुझाएको प्रतिवेदनमा दशरथ रंगशालालाई अयोग्य ठहर गर्दै एन्फालाई खेलस्थल परिवर्तन गर्न निर्देशन दिएको हो ।
रंगशाला निरीक्षण पछि टोलीले खेलस्थल मर्मत हुँदै गरेको र खेल हुने समयसम्म पनि पुनःनिर्माण कार्य सम्पन्न नहुने भएकोले स्थान परिवर्तन गर्न सिफारिस गरेको थियो । 
रंगशालाको निरीक्षण गरी बुझाएको प्रतिवेदनपछि अखिल नेपाल फुटबल संघ (एन्फा)ले विहीबार प्रेस विज्ञप्ति जारी गर्दै कुवेतसितको खेल सार्न निर्देशन आएको एन्फा प्रवक्ता किरण राईले बताए । उनले फिफा र एएफसीको निर्देशनअनुसार तटस्थस्थल भुटानको रंगशालाका लागि प्रस्ताव गरिएको पनि जानकारी दिए ।
यसअघि विश्वकप छनोटको सो खेल आउँदो मंसिर ३ गते दशरथ रंगशालामा हुने तय भएको थियो ।
मैदानकै अभावमा नेपालले विश्वकप छनोटका ‘अवे’ खेलहरु खेलिसकेको छ भने ‘होम’ खेल रंगशालामा खेल्नुपर्नेमा भुटान जानुपर्ने भएको हो ।