जसको सवाल उसकै नेतृत्व हुनुपर्नेमा जोड

२१ माघ, हेटौँडा । ग्रामीण महिला सेवा केन्द्रले आर्थिक वर्ष २०७२/०७३ मा सम्पन्न गरेको कार्यक्रमहरुको सामाजिक लेखा परीक्षण कार्यक्रम सम्पन्न भएको छ ।

कार्यक्रममा नेतृत्व विकासले पहुँच र नीति निर्माणमा महिलाको सहभागिता वृद्धि हुने सहभागीहरुले बताएका छन् । महिलाको सामाजिक–आर्थिक सशक्तिकरणका लागि जसको सवाल उसकै नेतृत्व हुनुपर्नेमा सहभागीहरुले कार्यक्रममा जोड दिएका थिए ।

कार्यक्रममा जिल्ला विकास समिति मकवानपुरका सामाजिक विकास अधिकृत रामकृष्ण थापाले राज्यले बनाएका संयन्त्रलाई बलियो बनाउन गैरसरकारी संस्थाहरुले सहयोग गर्नुपर्ने बताए । हेटौँडा उपमहानगरपालिकाका अधिकृत जगन्नाथ सापकोटाले गैससलाई स्थानीय निकायसँग सहकार्य गरी काम गर्न आग्रह गरे ।

केन्द्रका अध्यक्ष लक्ष्मी मोक्तानको अध्यक्षतामा भएको कार्यक्रममा संस्थाका उपाध्यक्ष उर्मिला कार्की, सदस्य मेनुका दाहाल, सल्लाहकार बिष्णु लामिछाने, नारी सीप सिर्जना केन्द्रका अनोजकुमार खड्कालगायतले मन्तव्य गरेका थिए ।

केन्द्रद्धारा सञ्चालित महिला सशक्तिकरण कार्यक्रम सक्षम तेश्रो तथा विद्यालय विपद् जोखिम न्यूनीकरण परियोजनासम्बन्धी कार्यक्रमको प्रगति प्रतिवेदन कार्यक्रम संयोजक पोषक भण्डारीले प्रस्तुत गरेका थिए । केयर नेपालसँगको साझोदारीमा
सञ्चालित दुवै कार्यक्रमको आर्थिक प्रगति प्रतिवेदन
प्रशासन तथा वित्त अधिकृत सम्झना ब्लोन कार्यक्रममा प्रस्तुत गरेकी थिईन् ।

युवा महिला संगठन कार्यक्रमका कार्यक्रम संयोजक रेश्मी कार्कीले कार्यक्रमको वार्षिक प्रतिवेदन तथा आर्थिक प्रगति प्रस्तुत गरेको कार्यक्रममा नेपाल पत्रकार महासंघ मकवानपुरका पूर्व अध्यक्ष एवं रेडियो मकवानपुरका स्टेशन संयोजक राममणि दाहालले सहजीकरण गरेका थिए ।