राईगाउँमा एकीकृत घुम्ती शिविर शुरू

२८ माघ, हेटौंडा । मकवानपुरको पूर्वी क्षेत्रको राईगाउँमा शुक्रबारदेखि दुई दिने एकीकृत घुम्ती शिविर शुरू भएको छ । शिविरको संस्कृति, पर्यटन तथा नागरिक उड्डयन राज्यमन्त्री ईन्द्रबहादुर बानियाँले कार्यक्रमको शुभारम्भ गरेका हुन् । राज्यमन्त्री बानियाँले राईगाउँ-८ कि ८६ बर्षिया अतिमाया जिम्बा र राईगाउँ-७ का ८३ बर्षिय बीरबलसिं बज्युलाई नागरिकता वितरण गरि कार्यक्रम शुभारम्भ गरेका थिए । 
कार्यक्रममा ज्येष्ठ नागरिक राईगाउँ-८ का फुलमाया भुलुन र विविमाया थिङलाई प्रमुख जिल्ला अधिकारी नारायणप्रसाद शर्मा दुवाडि र पवित्रा श्रेष्ठलाई स्थानीय विकास अधिकारी नारायण मैनालीले नागरिकता वितरण गरेका थिए । 
शुभारम्भ कार्यक्रममा राईगाउँका राजन राई, विरेन्द्र राई,  कान्छीमाया मोक्तान, छविलाल श्रेष्ठ, रूपबहादुर राना र मानबहादुर मोक्तानलाई अपांगता परिचयपत्र दिईएको थियो । कार्यक्रममा नगरिकता प्राप्त गरेका ५ जना ज्येष्ठ नागरिक र अपांगता परिचय प्राप्त गरेका ६ जनालाई सम्मान स्वरूप १/१ हजार रूपैयाँ उपलव्ध गराएका थिए । 
गाविस सचिव शुक्रमान राईको अध्यक्षतामा भएको कार्यक्रममा प्रमुख जिल्ला अधिकारी नारायणप्रसाद शर्मा दुवाडि, स्थानीय विकास अधिकारी नारायण मैनाली, नेपाली कांग्रेसका गाउँ सभापति शेरबहादुर लामा, महिला तथा बालबालिका कार्यालयकी शान्ति विश्वकर्माले मन्तव्य व्यक्त गरेका थिए । 
शिविरमा जिल्ला प्रशासन, स्वास्थ्य, कृषि, पशु, महिला बालबालिका लगायतका कार्यालयले सेवा प्रवाह गरेका छन् ।