नेपाललाई ३४ स्वर्ण, तालिकामा दोस्रो स्थानमा

१९ मंसिर, हेटौंडा । सुरुवाती दिनमा अग्रस्थानमा रहेको नेपाल १३औं दक्षिण एसियाली खेलकुद (साग)को स्वर्णतालिकामा दोस्रो स्थानमा रहेको छ । 
नेपाल विहीबार सम्म ३४ ओटा स्वर्णपदक सहित दोश्रो स्थानमा रहेको हो । सागको स्वर्ण तालिकामा नेपाललाई भारतले पछि पारेको हो । भारत ४९ स्वर्ण सहित पहिलो स्थानमा उक्लिएको छ ।
सोमबार १५, मंगलबार ८ र बुधबार ६ स्वर्ण जितेको नेपालले बिहीबार साइक्लिङमा दुई तथा पौडी, तेक्वान्दो र उसुमा एकरएक स्वर्णपदक जितेको छ । 
नेपाललाई बिहीबार तेक्वान्दोको ८७ केजीमुनि तौल समूहमा भूपेन श्रेष्ठले स्वर्णपदक दिलाए । यस्तै पौडीमा गौरिका सिंह, साइक्लिङको क्रसकन्ट्री महिलामा लक्ष्मी मगर र पुरुषमा बुद्धिबहादुर तामाङ र उसुमा निमा घर्तीमगरले स्वर्ण दिलाइन् ।
योसँगै नेपालले अहिलेसम्मको सागमा एकै संस्करणमा सबैभन्दा बढी स्वर्ण जित्ने कीर्तिमान बनाएको छ । नेपालले यसअघि सन् १९९९ मा काठमाडौंमा भएको आठौं सागमा ३१ स्वर्णपदक जितेको थियो ।
सागको स्वर्ण तालिकामा श्रीलंका १३ स्वर्ण सहित तेश्रो तथा १२ स्वर्ण सहित पाकिस्तान चौथो स्थानमा रहेको छ । 
यसैगरी बंगलादेशले ४ तथा माल्दिभ्सले १ स्वर्ण पदक जितेको छ । पुछारमा रहेको भुटानले भने ६ वटा कास्य पदकमात्रै जितको छ ।