‘ए’ डिभिजन लिगः पुलिसको जित, मनाङ र थ्री स्टार बराबरी 

४ माघ, हेटौंडा । काठमाडौंमा जारी सहिद स्मारक ‘ए’ डिभिजन लिग फुटबलमा अन्तर्गत शनिवारको खेलमा बिभागीय टोली नेपाल पुलिस क्लबले जित निकाल्दा साविक विजेता मनाङ मस्र्याङ्दी र थ्री स्टार क्लबले  बराबरी खेलेका छन् ।
एन्फा कम्प्लेक्स सातदोबाटोमा भएको पहिलो खेलमा पुलिसले जावलाखेल युथ क्लबमाथी २–० को जित निकालेको हो । पुलिसको जितका लागी सौजन राई र सुमन सुवेदीले १–१ गोल गरे । उनीहरुले क्रमशः खेलको २७ औँ र ४८ औँ मिनेटमा गोल गरेका हुन् । 
यस्तै शनिवारनै भएको दोश्रो खेलमा साविक विजेता टोली मनाङ मस्र्याङ्दीले थ्री स्टार क्लबसँग बराबरी खेलेको छ । मनाङ र थ्री स्टारले २–२ गोलको बराबरी खेलेका हुन् । 
त्रिपुरेश्वरस्थित दशरथ रंगशालामा भएको खेलमा थ्री स्टारका लागि भारतीय खेलाडी लाल रम्मावियाले दुई गोल गरे भने मनाङका लागि अन्जन विष्टले पनि दुई गोल गरे । 
शनिवारको जितसँगै पुलिसले ७ खेलमा ११ अंक जोडेर लिगको चौथो स्थानमा उक्लिएको छ । पराजित जावलाखेल ७ खेलमा ९ अंक जोड्दै लिगको छैटौं स्थानमा छ । 
यस्तै शनिवारको खेलमा बराबरीपछि मनाङले सात खेलमा १३ अंक बनाएको छ । तर गोल अन्तरका आधारमा मनाङ तेस्रो स्थानमा कायम छ । 
जारी लिगमा अपराजित रहने मनाङ एक्लो टिम बनेको छ । थ्रीस्टारको सात खेलमा ११ अंकका साथ पाँचौ स्थानमा झरेको छ । लिगमा शिर्ष तीन क्लवको समान १३–१३ अंक भएको छ । 
शिर्ष स्थानको आर्मीको छ खेलमा १३ अंक छ भने दोस्रो स्थानको मच्छिन्द्रको १३ अंक नै छ ।