मकवानपुर गोल्डकप चैत्र २९ बाट, तयारी तीव्र

२० फागुन, हेटौंडा । मकवानपुर जिल्ला फुटबल संघको आयोजनामा हेटौंडामा हुने तेस्रो संस्करणको मकवानपुर गोल्डकप फुटबल प्रतियोगिताको तयारी थालिएको छ ।
प्रतियोगिता यही चैत्र २९ गतेबाट सञ्चालन हुने जिल्ला फुटबल संघले जनाएको छ । यसअघि अखिल नेपाल फुटबल संघ (एन्फा) ले फागुन २९ बाट खेल सञ्चालन गर्न अनुमती दिएकोमा विभिन्न गोल्डकपको मिति जुधेकोले आयोजकले एक महिना पछिको मिति मागेको थियो ।
गत बर्ष मकवानपुर गोल्डकपको नाममा सञ्चालन भएको गोल्डकपको नाम यस बर्षबाट स्थानीय तह तेस्रो राष्ट्रिय फुटबल प्रतियोगिता मकवानपुर गोल्डकप हुनेछ । प्रतियोगिताको लागि जिल्लाका स्थानीय तहले ६५ लाख रुपैयाँ सहयोग गर्ने भएका छन् ।
गत बर्ष भन्दा यस बर्ष मकवानपुर गोल्डकपको पुरस्कार राशीमा समेत बृद्धि गरिने भएको छ । गत बर्ष विजेता र उपविजेतालाई क्रमश ः नगद ८ लाख र ४ लाख रुपैयाँ प्रदान गरिएको थियो । 
यस बर्ष विजेतालाई १० र उपविजेतालाई ५ लाख रुपैयाँ प्रदान गरिने आयोजक फुटबल संघका अध्यक्ष टीकाराम लामाले जानकारी दिए । 
यस्तै विधातगत उत्कृष्ट खेलाडी तथा प्रशिक्षकलाई जनही नगद २५ हजार, हरेक खेलको म्यान अफ द म्याचलाई १० हजार र प्रतियोगिताको सर्वोत्कृष्ट खेलाडीलाई ७५ हजार रुपैयाँ प्रदान गरिने लामाले बताए ।
वन विज्ञान अध्ययन संस्थान (फरेष्ट्री) को खेल मैदानमा हुने प्रतियोगितामा सहभागिताका लागि ए डिभिजन क्लवलाई पत्र पठाइसकिएको पनि लामाले जानकारी दिए ।
मकवानपुर गोल्डकपमा विभागीय टिमसहित ए डिभिजन क्लवहरु थ्रीस्टार, मछिन्द्र, जावलाखेल, हिमालयन शेर्पा र गत बर्षको उपविजेता टिम दाफिन्सको समेत सहभागिता रहने बताइएको छ । 
गत बर्ष आयोजकको टिम मकवानपुर ११ ले प्रतियोगिता जितेको थियो । साभारः प्रदेश दैनिक