कोरोनाबाट अमेरिकामा एकैदिन २ हजार बढीको मृत्यु 

३ बैशाख, हेटौंडा । विश्वव्यापी महामारीको रुपमा फैलिरहेको कोरोना भाइरस अर्थात कोभिड १९ को मार खेपिरहेको अमेरिकामा संक्रमणबाट एकैदिन २ हजार ४ सय ७ जनाको ज्यान गएको छ । 
विश्वका सबैभन्दा बढी मानिसको मृत्यु भएको अमेरिकामा यो सँगै कुल मृत्यु हुनेको संख्या २६ हजार २४ पुगेको छ । 
कोभिड १९ को तथ्याङक प्रस्तुत गरिरहेको वल्डोभिटर वेबसाइटका अनुसार अहिलेसम्म अमेरिकामा ६ लाख १३ हजार ८८६ जना कोरोना भाइरसबाट संक्रमित भएका छन् । यहाँ १३ हजार ४ सय ७३ जनाको अवस्था गम्भिर रहेको छ ।
पछिल्लो २४ घण्टामा मात्रै यहाँ २६ हजार ९ सय ४५ जना नयाँ संक्रमित थपिएका छन् । यस्तै अमेरिकामा ३८ हजार ८ सय २० जना उपचारपछि स्वस्थ्य भएका छन् । 
अमेरिकाका पचास वटै राज्यमा कोरोना संक्रमण फैलिएकोमा न्युयोर्क राज्य सबैभन्दा बढी प्रभावित भएको छ । यहाँ अहिलेसम्म २ लाख ३ हजार १ सय २३ जना संक्रमित भएका छन भने १० हजार ८ सय ३४ जनाको ज्यान गएको छ । न्युयोर्कमा एकैदिन ७ हजार ४ सय ६८ जना नयाँ संक्रमित थपिएका छन् ।
यसैगरी अमेरिकाको दोस्रो प्रभावित राज्यमा न्यूजर्सी रहेको छ । यहाँ ६८ हजार ८ सय २४ जना संक्रमित भएका छन भने २ हजार ८ सय ५ जनाको मृत्यु भएको छ । 
यस्तै अमेरिकाको मासाचुसेटमा २८ हजार भन्दा बढी संक्रमित छन भने ९ सय ५७ जनाको मृत्यु भएको छ । अन्य राज्यहरु मिचिगन, क्यालिफोर्निया, पेन्सिलभानिया, फ्लोरिडा, इलिनोइस लगाएतमा दिनानुदिन संक्रमित र मृतकको संख्या बढीरहेको छ ।