कोरोनाबाट अमेरिकामा एकैदिन २३ सय बढीको मृत्यु 

११ बैशाख, हेटौंडा । अमेरिकामा कोरोना भाइरस अर्थात कोभिड १९ को संक्रमणबाट एकैदिन २३ सय बढीको ज्यान गएको छ । 
कोभिड १९ को तथ्याङक प्रस्तुत गरिरहेको वल्डोभिटर वेबसाइटका अनुसार अमेरिकामा वितेको २४ घण्टामा २ हजार ३ सय ४१ जनाको ज्यान गएको हो । 
विश्वका सबैभन्दा बढी मानिसको मृत्यु भएको अमेरिकामा यो सँगै कुल मृत्यु हुनेको संख्या ४७ हजार ६ सय ७६ पुगेको छ ।
अहिलेसम्म अमेरिकामा ८ लाख ४८ हजार ९ सय ९४ जना कोरोना भाइरसबाट संक्रमित भएका छन् । यहाँ एकैदिन थप २९ हजार ९ सय ७३ जना नयाँ संक्रमित थपिएका छन् ।
अमेरिकामा १४ हजार १६ जना संक्रमितको अवस्था गम्भिर रहेको छ भने ८४ हजार ५० जना उपचारपछि स्वस्थ्य पनि भएका छन् । 
अमेरिकामा कोरोना संक्रमणबाट सबैभन्दा बढी न्युयोर्क राज्य प्रभावित भएको छ । यहाँ अहिलेसम्म २० हजार ३ सय ५४ जनाको ज्यान गएको छ । यहाँ एकैदिन ६ सय ६१ जना संक्रमितको मृत्यु भएको छ । 
२ लाख ६२ हजार २ सय ६८ जना संक्रमित रहेको न्युयोर्कमा एकैदिन ५ हजार ७ सय १३ जना नयाँ संक्रमित थपिएका छन । 
यसैगरी अमेरिकाको दोस्रो प्रभावित राज्यमा न्यूजर्सी रहेको छ । यहाँ संक्रमितको संख्या ९५ हजार ८ सय ६५ पुगेको छ भने ५ हजार ६३ जनाको मृत्यु भएको छ । 
यस्तै अमेरिकाको मासाचुसेट राज्यमा ४२ हजार ९ सय ४४ जना संक्रमित छन भने २ हजार १ सय ८२ जनाको मृत्यु भएको छ । 
यसैगरी अमेरिकाका मिचिगन, लुसियाना, क्यालिफोर्निया,इलिनोइस, कनेक्टिकट, पेन्सिलभानिया, फलोरीडा जस्ता राज्यहरु कोरोना संक्रमणबाट प्रभावित भएका छन् ।