चीनको हुबेमा थप कोरोना संक्रमण नभएको दाबी

२० बैशाख, हेटौंडा । कोरोना भाइरसको उत्पत्तिस्थल मानिएको चीनको मध्य प्रान्त हुबेमा शुक्रबार थप कोही व्यक्तिमा कोरोना भाइरस संक्रमण नदेखिएको प्रान्तीय स्वास्थ्य निकायले जनाएको छ । 
चीनको हुबे प्रान्तको वुहान शहरबाट गत डिसेम्बरको अन्त्यबाट पहिलो पटक कोरोना भाइरसको सक्रमण देखिएको थियो । 
यसैलगत्तै विश्वको कैयौ देशमा फैलिएको यस कोरोना भाइरसको संक्रमण हाल विश्वका २१० भन्दा बढी देश देखिएको छ । 
यस भाइरसबाट विश्वभरी अहिलेसम्म ३४ लाख २२ हजार ४ सय ८० जना संक्रमित भएका छन् । यस भाइरसको संक्रमणको कारण विश्वभरी २ लाख ४० हजार भन्दा बढी मानिसहरुको मृत्यु भइसकेको छ ।
यस भाइरसबाट संयुक्त राज्य अमेरिका सव भन्दा बढी प्रभावित भएको छ । यहाँ ११ लाख ३२ हजार भन्दा बढी संक्रमित भएका छन भने ६५ हजार भन्दा बढीको मृत्यु भएको छ । 
स्पेनमा २ लाख ४५ हजार भन्दा बढी संक्रमित भएका छन भने २५ हजार भन्दा बढीको ज्यान गएको छ । यसैगरी विश्वका शक्तिशाली देशहरु इटाली, बेलायत, फ्रान्स, जर्मनी, टर्की  रुस यस भाइरसबाट अत्यन्त प्रभावित भएको छ ।  
शुरुमा यस भाइरसको प्रकोप देखिएको चीनमा ८२ हजार ८७५ कोरोना भाइरसको संक्रमण देखिएको छ । हालसम्म चीनमा यस प्रकोपबाट ४ हजार ६३३ को मृत्यु भएको छ ।