कोरोना संक्रमितको संख्या ४० लाख नाघ्यो

२७ बैशाख, हेटौंडा । विश्वभर महारामारीको रुपमा फैलिरहेको कोरोना भाइरस (कोभिड–१९) बाट संक्रमित हुनेको संख्या ४० लाख नाघेको छ ।
कोरोना भाइरसको तत्थ्याङक सार्वजनिक गरिरहेको वेवसाइट वल्डोमिटरका अनुसार अहिलेसम्म कोरोना संक्रमितको संख्या ४० लाख १० हजार ६ सय ११ पुगेको छ ।
पछिल्लो २४ घण्टामा मात्रै संक्रमितको संख्या ९६ हजार ९ सय ६७ जनाले थपिएको छ । संक्रमित मध्ये अहिलेसम्म २ लाख ७५ हजार भन्दा बढीको मृत्यु भइसकेको छ । 
यसैगरी संक्रमितहरु मध्ये ठूलो संख्यामा उपचारपछि निको पनि भएका छन् । पछिल्लो तथ्यांक अनुसार १३ लाख ८२ हजार ३ सय ४४ जना संक्रमित उपचारपछि निको भएका छन् ।
विश्वमा सबैभन्दा बढी मानिस अमेरिकामा संक्रमित भएका छन् । यहाँ अहिलेसम्म १३ लाख २१ हजार ६ सय ६६ मानिस संक्रमित भएका छन । पछिल्लो २४ घण्टामा अमेरिकामा २९ हजार ४३ जना नयाँ संक्रमित थपिएका छन् ।
अमेरिकापछि स्पेनमा सबैभन्दा बढी संक्रमित रहेका छन् । यहाँ २ लाख ६० हजार १ सय १७ जना संक्रमित रहेका छन् । 
यसैगरी इटलीमा कोरोना संक्रमितको संख्या २ लाख १७ हजार १ सय ८५ रहेका छन भने बेलायतमा २ लाख ११ हजार ३ सय ६४ जना संक्रमित रहेका छन् ।
पछिल्लो समय कोरोना संक्रमितको संख्या बढीरहेको रुसमा १ लाख ८७ हजार ८ सय ५९ जना संक्रमित पुगेका छन् । 
यस्तै जर्मनी, ब्राजिल, टर्की, इरान लगाएतका मुलुकहरुमा एक लाख भन्दा बढीको संख्यामा मानिसहरु संक्रमित रहेका छन् ।