सरकारको नीति तथा कार्यक्रममा सडकका योजना

३ जेठ, हेटौंडा । सरकारले स्वास्थ्य क्षेत्रलाई मुख्य प्राथमिकता राखेको भएपनि भौतिक पुर्वाधारका पुराना कार्यक्रमलाई पनि निरन्तरता दिएको छ । 
गत आर्थिक वर्षमा मदन भण्डारी राजमार्ग निर्माण ५ वर्षभित्र सम्पन्न गर्ने लक्ष्य राखेको सरकारले अहिले पनि सोही समयावधी राखेर राजमार्ग निर्माण गर्ने कार्यक्रमलाई समावेश गरेको छ ।
सरकारले मदन भण्डारी राजमार्ग निर्माण गरि एक वर्षभित्र १ सय ५५ किलोमिटर सडक कालोपत्रे गर्ने कार्यक्रम अघि सारेको छ । 
जनस्वास्थ्य र पुर्वाधारमा ठूलो बजेट विनियोजन गर्नुपर्ने वर्तमान आवश्यकता संगै सरकारले भौतिक पुर्वाधारका पुराना कार्यक्रमलाई पनि यथावतरुपमा निरन्तरता दिने भएको छ । 
सरकारले ३ बर्ष भित्र मध्यमहाडी पुष्पलाल लोकमार्गको निर्माण सम्पन्न गर्ने, हुलाकी राजमार्गको २ सय ५० किलोमिटर र उत्तरदक्षिण लोकमार्ग अन्तर्गत कालिगण्डकी कोरिडोरको ९० किलोमिटर कालोपत्रे गर्ने भएको छ । 
कोशी र कर्णाली कोरिडोरको ट्रयाक स्तरोन्नतीको काम सुरु गर्ने, नागढुंगा नौबिसे सडक खण्ड अन्र्तगतको सुरुङमार्गको २ दशमलव ६८ किलोमिटर मध्ये १ किलोमिटर सुरुङ खन्ने काम आगामी आर्थिक वर्ष गर्ने कार्यक्रम छ ।  
यस्तै सिद्धार्थ राजमार्गको बुटवल पाल्पा खण्डको सिद्धबाबा क्षेत्रमा सुरुङ निर्माण सुरु गर्ने, पूर्वपश्चिम राजमार्ग अन्तर्गत नारायणगढ–बुटवल सडक चारलेनको बनाएर सम्पूर्ण खण्डलाई चार लेनको दु्रत मार्गको रुपमा विकास गर्ने, नारायणगढ बुटवल खण्ड र कमला कञ्चनपुर खण्डको विस्तार कार्य तीन वर्ष भित्र सम्पन्न गर्ने, बेत्रावति–साफ्रुबेसी टोखा–छहरे गुर्जेभन्ज्याङ–खुटीया दिपायल लगायतका सुरुङ निर्माणको काम अघि बढाइने, रसुवागढी काठमाडौं रेलमार्ग, विरगञ्ज काठमाडौं रेलमार्ग निर्माणको प्रारम्भिक सुरु गरिने भएको छ ।
पुर्व पश्चिम विद्युतिय रेलमार्ग आयोजनाको पूर्वतयारी सम्पन्न गरी काकडभिट्टा—इनरुवा खण्डको निर्माण सुरु गर्ने र विद्युतिय यातायात प्रणालीलाई प्रोत्साहन गर्ने कार्यक्रम पनि सरकारले बनाएको छ ।  फोटोः गुगल