विश्वभर कारोना संक्रमितको संख्या ५० लाख नजिक

७ जेठ, हेटौंडा । विश्वभर महारामारीको रुपमा फैलिरहेको कोरोना भाइरस (कोभिड–१९) बाट संक्रमित हुनेको संख्या ५० लाख नजिक पुगेको छ ।
कोरोना भाइरसको तत्थ्याङक सार्वजनिक गरिरहेको वेवसाइट वल्डोमिटरका अनुसार अहिलेसम्म कोरोना संक्रमितको संख्या ४९ लाख ८२ हजार ८५० पुगेको छ ।
पछिल्लो २४ घण्टामा मात्रै संक्रमितको संख्या ९४ हजार ७ सय २६ जनाले थपिएको छ । संक्रमित मध्ये अहिलेसम्म ३ लाख २४ हजार ५ सय २३ जनाको मृत्यु भइसकेको छ । 
विश्वमा सबैभन्दा बढी मानिस अमेरिकामा संक्रमित भएका छन् । यहाँ अहिलेसम्म १५ लाख ७० हजार ५ सय ५८ जना मानिस संक्रमित भएका छन । पछिल्लो २४ घण्टामा अमेरिकामा २० हजार २ सय ६४ जना नयाँ संक्रमित थपिएका छन् ।
अमेरिकापछि रसियामा संक्रमितको संख्या सबैभन्दा बढी रहेको छ । यहाँ २ लाख ९९ हजार ९ सय ४१ जना संक्रमित रहेका छन् । यहाँ २४ घण्टामा ९ हजार २ सय ६३ जना नयाँ संक्रमित थपिएका छन् ।
केही समय संक्रमितको संख्या लगातार घटिरहेको स्पेनमा अहिलेसम्म २ लाख ७८ हजार ८ सय ३ जना संक्रमित पुगेका छन भने पछिल्लो समय लगातार संक्रमित बढिरहेको ब्राजिलमा २ लाख ७१ हजार ८ सय ८५ पुगेको छ ।
यसैगरी बेलायतमा संक्रमितको संख्या २ लाख ४८ हजार ८ सय १८ पुग्दा इटलीमा कोरोना संक्रमितको संख्या २ लाख २६ हजार ६ सय ९९ पुगेको छ ।
यसैगरी फ्रान्स, जर्मनी, टर्की, इरान, भारत, पेरु लगाएतका मुलुकहरुमा संक्रमितको संख्या दिनानुदिन बढिरहेको छ ।