विश्वमा कोरोना संक्रमितको संख्या २ करोड १८ लाख नाघ्यो

१ भादौ, हेटौंडा । विश्वभर कोरोना भाइरस संक्रमितको संख्या दुई करोड १८ लाख नाघेको छ । 
यो समाचार तयार पार्दसम्म विश्वका दुई करोड १८ लाख १८ हजार १ सय १६ जना मानिसमा कोरोनाको संक्रमण पुष्टि भएको वर्ल्डोमिटरले जनाएको छ ।
कोरोना भाइरस संक्रमणको कारण विश्वभर सात लाख ७२ हजार ७ सय ५९ जना मानिसको मृत्यु भएको छ भने कोरोना संक्रमण भएका मध्ये एक करोड ४५ लाख ५३ हजार भन्दा धेरै मानिस संक्रमणमुक्त भएका छन् । 
अहिले विश्वमा ६४ लाख ९३ हजार भन्दा धेरै सक्रिय संक्रमित रहेका छन् । उनीहरुमध्ये ६४ हजार ३ सयभन्दा धेरै मानिस गम्भीर अवस्थामा रहेका छन् । 
चीनको हुबेई प्रान्तको वुहान शहरबाट गएको डिसेम्बर महिनाको अन्त्यबाट सुरु भएको कोरोना भाइरस अहिलेसम्म विश्वका दुई सय १६ देश तथा विभिन्न क्षेत्रमा पुगिसकेको विश्व स्वास्थ्य सङ्गठन (डब्ल्यूएचओ) ले जनाएको छ ।
अहिलेसम्म सबैभन्दा धेरै अमेरिकामा ५५ लाख ६६ हजार भन्दा धेरैमा कोरोना भाइरसको संक्रमण पुष्टि भएको छ । पछिल्लो २४ घण्टामा मात्रै अमेरिकामा ३६ हजार भन्दा बढी नयाँ संक्रमित थपिएका छन् ।
यस्तै दोस्रो धेरै प्रभावित देशमा ब्राजिल रहेको छ । ब्राजिलमा ३३ लाख ४० हजारभन्दा धेरैमा संक्रमण पुष्टि हुँदा यहाँ एकैदिन २२ हजार भन्दा धेरै संक्रमित थपिएका छन् ।
यसैगरी तेस्रो धेरै प्रभावित रहेको भारतमा २६ लाख ४७ हजारभन्दा बढी मानिस कोरोना भाइसरबाट संक्रमित छन् । यहाँ वितेको २४ घण्टामा एकैदिनमा विश्वको सबैभन्दा धेरै ५८ हजार १ सय ८ जना नयाँ संक्रमित थपिएका छन् ।