आईपीएलमा चेन्नईलाई हराउँदै मुम्बई शीर्ष स्थानमा उक्लियो

८ कार्तिक, हेटौंडा । साविक विजेता मुम्बई इन्डियन्स युएईमा जारी १३ औं संस्करणको इन्डियन प्रिमियर लिग टी–२० क्रिकेटको शीर्ष स्थानमा उक्लिएको छ ।
सारजाहमा शुक्रबार राति भएको खेलमा चेन्नई सुपर किङ्सलाई १० विकेटले पराजित गर्दै मुम्बई शीर्ष स्थानमा उक्लिएको हो । सारजाह क्रिकेट स्टेडियममा चेन्नईले दिएको १ सय १५ रनको लक्ष्य मुम्बईले १२ ओभर २ बलमा बिना विकेटको क्षतिमा पुरा गर्यो ।
मुम्बईको जितमा इशान किशनले ६८ र क्विन्टन डी ककले ४६ रनको अविजित पारी खेले । यस अघि टस हारेर पहिले ब्याटिङ गरेको चेन्नईले २० ओभरमा ९ विकेट गुमाएर १ सय १४ रन बनाएको थियो ।
चेन्नईका लागि साम करणले सर्वाधिक ५२ रनको अर्धशतकीय इनिङ्स खेले । बाँकी खेलाडीले राम्रो प्रदर्शन गर्न सकेनन् । चेन्नइका लागी कप्तान महेन्द्र सिंह धोनीले १६, इमरान ताहिर १३, सार्दुल ठाकुरले ११,  रविन्द्र जडेजा ७,  अम्बाती रायडु २ र फाप डु प्लेसिस १ रन बनाए ।
खराब ब्याटिङ गरेको चेन्नईले मात्र २१ रन जोड्दा महत्वपूर्ण ५ विकेट गुमाएको थियो । साम करणले सम्हालिएर खेल्दै चेन्नईको इनिङ्स उकासेका थिए ।
चेन्नईलाई सस्तैमा समेट्ने क्रममा मुम्बईका ट्रेन्ट बोल्टले ४ विकेट लिए । राहुल चाहर र जस्प्रित बुम्राहले २ ÷ २ विकेट लिए भने कल्टर निलले १ विकेट लिए ।
जितसँगै मुम्बईले १० खेलमा ७ जितसहित १४ अंक जोडेको छ । चेन्नईले भने ११ खेलमा ६ अंक जोडेको छ । पुछारमा रहेको चेन्नईको यो आठौं हार हो ।