नगरकप महिला तथा पुरुष भलिबल प्रतियोगिता आजबाट

१९ फागुन, हेटौंडा । केशवलाल श्रेष्ठ स्मृती राष्ट्रिय  प्रतिष्ठानको आयोजनामा नगर महिला तथा पुरुष भलिवल प्रतियोगिता आज बुधबारबाट सुरु हुने भएको छ । 
मंगलबार पत्रकार सम्मेलनको आयोजना गर्दै हेटौंडा उपमहानगरपालिका संगको सहकार्यमा प्रतियोगिता सञ्चालन हुने केशवलाल श्रेष्ठ स्मृती प्रतिष्ठानका महासचिव बसन्तकुमार सिटौलाले जानकारी दिए । उपमहानगरपालिकाको १९ वटा वडा मध्ये १३ वडाका पुरुष र १० वडाका महिलाहरुले प्रतियोगितामा सहभागिता जनाउने आयोजकले जनाएको छ । 
प्रतियोगिताको महिला र पुरुषका विजेता समूहले नगद ५० हजार रुपैयाँ र उपविजेताले नगद ३० हजार रुपैयाँसहित शिल्ड, मेडल र प्रमाणपत्र प्राप्त गर्नेछन् । त्यस्तै विधागत रुपमा उत्कृष्ठ हुने खेलाडीले जनही २ हजार ५ सय रुपैयाँ प्राप्त गर्ने आयोजकले जनाएको छ । 
२०७२ सालको विनाशकारी महाभूकम्पमा परि भलिवलका प्रशिक्षक केशवलाल श्रेष्ठको निधन भएको थियो । भूकम्पमा निधन भएका श्रेष्ठको सम्झनामा स्थापना भएको प्रतिष्ठानले आयोजना गरेको भलिवलको यो तेश्रो संस्करण हो । 
श्रेष्ठको भलिवल प्रतिको योगदानलाई जिवन्त राख्न, खेलाडी उत्पादन गर्न, खेलाडीहरुको क्षमता अभिवृद्धिका लागि प्रतियोगिताको आयोजना गरिएको प्रतिष्ठानका अध्यक्ष प्रताप विष्टले जानकारी दिए । 
लिग कम नकआउटकोे आधारमा सञ्चालन हुने प्रतियोगिता २२ गतेसम्मे चल्नेछ । प्रतियोगिताको उद्घाटन खेल महिलातर्फ वडा नम्बर ५ र ६ वडा नम्बर को बीचमा हुने र पुरुष तर्फको पहिलो खेल वडा नम्बर १९ र वडा नम्बर ३ को बीचमा हुनेछ ।