हेटौंडा नगरकप फुटबलको सेमीफाइनल समीकरण पूरा

२२ फागुन, हेटौंडा । हेटौंडा उपमहानगरपालिका खेलकुद विकास समितिले प्रतियोगिताको आयोजनामा यही फागुन १४ गतेबाट हेटौंडामा जारी हेटौंडा मेयर कप फुटबल २०७७ को सेमिफाइनल समिकरण पुरा भएको छ ।
शुक्रबार सम्पन्न क्वाटरफाइनलका खेलहरुबाट वडा नम्बर १८ र वडा नम्बर १० सेमीफाइनल प्रवेश गरेसंगै प्रतियोगिताको सेमीफाइनल समीकरण पूरा भएको हो । यसअघि भएको खेलबाट हेटौंडाको वडा नम्बर १३ र ५ नम्बर वडा सेमीफाइनल प्रवेश गरिसकेका छन् । 
शुक्रबार भएको पहिलो खेलमा वडा नम्बर १८ ले ७ लाई २–० गोलले हराउँदै सेमीफाइनल यात्रा तय गरेको हो । वडा नम्बर १८ को जितका लागि विमल घलान र अजय घलानले एक एक गोल गरे । खेलमा १८ नम्बर वडाका अनिष रोक्का म्यान अफ द म्याच भए । 
यस्तै शुक्रबारनै भएको खेलमा हेटौंडाको १९ नम्बर वडालाई टाइब्रेकरमा हराउँदै साविक विजेता १० नम्बरले सेमीफाइनल भिडन्त पक्का गरेको छ । सुरुवातीमा लिएको अग्रता जोगाउन नसक्दा १९ ले हार व्यहोर्नुपरेको हो । 
२८ औं मिनेटमा १९ का सन्जिव गिरीले पेनाल्टीमार्फत गोल गर्दै अग्रता दिलाएका थिए । ३१ औं मिनेटमा १० नम्बर वडाका सुमन छुमीले गोल गर्दै खेललाई बराबरीमा ल्याए । खेलको म्यान अफ द म्याच १० नम्बर वडाका गोलरक्षक दिपेश गोले भए । फाइनल प्रवेशको लागि वडा नम्बर १३ ले वडा नम्बर १० संग र वडा नम्बर १८ ले वडा नम्बर ५ संग खेल्नेछ ।