हेटौंडा मेयर कपको फाइनलमा वडा नम्बर १० र १८ भिड्ने

२३ फागुन, हेटौंडा । हेटौंडाको हुप्रचौरमा जारी मेयर कप फुटबल प्रतियोगिता–२०७७ को उपाधिको लागि डिफेण्डिङ च्याम्पियन १० नम्बर वडा र १८ नम्बर वडा भिड्ने भएका छन् । 
हेटौंडा उपमहानगरापकिाल वडा नम्बर १० र वडा नम्बर १८ हेटौंडामा जारी हेटौंडा मेयर कप फुटबल प्रतियोगिताको फाइनलमा प्रवेश गरेका छन् । सेमीफाइनलमा वडा नम्बर १० ले वडा नम्बर १३ लाई र वडा नम्बर १८ ले वडा नम्बर ५ लाई टाइब्रेकरमा पाखा लगाउँदै उपाधि भिडन्त पक्का गरेको हुन् । 
शनिवार सम्पन्न भएको वडा नम्बर १० र वडा नम्बर १३ बीचको पहिलो सेमिफाइनल खेल निर्धारित समय १–१ गोलको बराबरी भएपछि टाइब्रेकरमार्फत निर्णय लिइएको थियो । १० नम्बरको तर्फबाट ८ औं मिनेटमा सुमन छुमीले गोल गर्दै टिमलाई अग्रता दिलाएका थिए । १३ को तर्फबाट सनुअल सुनारले पेनाल्टीमार्फत गोल गर्दै खेललाई बराबरीमा ल्याएका थिए । बाँकी समय दुवै टोलीको तर्फबाट थप गोल नभएपछि खेल टाइब्रेकरमा पुगेको थियो । 
टाइब्रेकरमा १० को तर्फको सुमन छुमी, विजय लामा, आशिष लामा र प्रितम स्याङ्बोले गोल गरेका थिए भने १३ को तर्फबाट कप्तान श्री स्याङ्तानको प्रहार मात्रै गोल भएको थियो । खेलमा १० नम्बर वडाका गोलरक्षक दिपेश गोले म्यान अफ द म्याच भए ।
यस्तै दोस्रो सेमीफाइनलमा ५ नम्बर वडालाई टाइब्रेकरमा स्तब्ध पार्दै १८ ले फाइनल भिडन्त पक्का गरेको हो । सुरुवाती अग्रता जोगाउन नसक्दा ५ नम्बर वडा निराश हुँदै घर फर्किन बाध्य भयो । वडा नम्बर ५ को तर्फबाट मिलन अर्यालले २६ औं मिनेटमा गोल गर्दै टिमलाई अग्रता दिलाएका थिए । तर वडा नम्बर १८ का विमल घलानले गोल गर्दै खेललाई बराबरीमा ल्याए । 
निर्धारित समयमा दुबैतर्फबाट एक एक गोलको बराबरी भएपछि टाइब्रेकरमा वडा नम्बर १८ ले ५–४ को जित निकालेको हो । ५ को तर्फबाट टीका चौलागाइँ, मिलन अर्याल, सुमन अर्याल र सन्जिव अर्यालले मात्रै गोल गरेका थिए । मनोज बिष्ट र निसान भुषालको प्रहार गोल हुन सकेन । 
यस्तै १८ का लागि सुनिल घलान, कृष्णबहादुर गुरागाइँ, राजेश पाण्डे, आयुर घलान र अनिष रोक्काले गोल गरेका थिए । सुदिप लोको प्रहार भने गोल हुन सकेन । खेलमा १८ नम्बर वडाका अनिष रोक्का म्यान अफ द म्याच भए । फाइनल खेल भोली सोमबार हुनेछ । प्रतियोगिताको विजेताले २ लाख र उपविजेताले १ लाख रुपैयाँसहित ट्रफी प्राप्त गर्नेछन् ।