स्थानिय तह शहीद स्मृति गोल्डकप फुटबल प्रतियोगिता आजबट सुरु हुँदै

२७ फागुन, हेटौंडा । स्थानीय तह शहीद स्मृति गोल्डकप फुटबल प्रतियोगिताको तेश्रो संस्करण आज (बिहिबार)बाट सुरु हुँदैछ । हेटौंडा उपमहानगरपालिका वडा नम्बर १० मा रहेको वन विज्ञान अध्ययन संस्थान (फरेष्ट्री)को खेल मैदानमा हुने प्रतियोगिताको सम्पूर्ण तयारी पुरा भएको प्रतियोगिता संयोजक प्रताप विष्टले जानकारी दिएका छन् ।
आज हुने प्रतियोगिताको उद्घाटन खेलमा आयोजक रिगल हेटौंडा रिर्सोट मकवानपुर–११ र नव जनजागृति युवा क्लब सिमराबीच हुनेछ । प्रतियोगितामा एउटा विदेशी क्लब सहित १० टिमको सहभागिता रहेको प्रतियोगिता संयोजक विष्टले जानकारी दिए । 
प्रतियोगितामा तीन वटा विभागीय टोली नेपाल पुलिस क्लब, नेपाल आर्मी क्लब र सशस्त्र प्रहरी बल नेपाल सहति मच्छिन्द्र क्लब, संकटा क्लब, जावलाखेल युथ क्लबको सहभागिता रहने आयोजकले जनाएको छ । 
यस्तै प्रतियोगितमा बागमती युवा क्लब सर्लाही र विदेशी क्लबको रुपमा अफ्रिकन रुट्स एसेसिएसन (अरास) क्यामरुनको सहभागिता रहने छ । प्रतियोगिताको विजेताले नगद १० लाख र उपविजेताले ५ लाख रुपैयाँसहित ट्रफी र प्रमाणपत्र प्राप्त गर्नेछ । 
यस्तै सर्वोत्कृष्ट खेलाडीलाई नगद ५० हजार तथा विधागत उत्कृष्ट खेलाडी र प्रशिक्षकलाई जनही नगद २५ हजार एवम् हरेक खेलको म्यान अफ द म्याचलाई १० हजार रुपैयाँसहित ट्रफीको व्यवस्था गरिएको छ ।