त्रिदेशिय फुटबलमा नेपाल बराबरीमा रोकियो, बंगलादेश फाइनलमा 

१३ चैत, हेटौंडा । अखिल नेपाल फुटबल संघ (एन्फा) को आयोजनामा सुरु भएको त्रिदेशिया अन्तराष्ट्रिय फुटबल प्रतियोगिताका पहिलो खेलमा नेपाल बराबरीमा रोकिएको छ ।
त्रिपुरेश्वरस्थित दशरथ रंगशालामा बिहीबार भएको आफ्नो पहिलो खेलमा नेपाल १० खेलाडीमा सिमित भएको किर्गिस्तानको २३ बर्ष मुनिको टिमसँग गोलरहित बराबरीमा रोकिएको हो ।
त्रिपुरेश्वरस्थित दशरथ रंगशालामा बल पोसेसनमा पकड जमाएपनि गोल गर्न नसक्दा नेपालले किर्गिस्तानको ओलम्पिक टिमसँग बराबरी खेल्नु परेको हो । किर्गिस्तानविरुद्ध नेपालले लगातार पोस्ट आक्रमण गरेको थियो । तर, गोल भने निकाल्न सकेन ।
खेलको ६७ औं मिनेटमा कप्तान टासिभ कामोलिदीन दोहोरो पहेलो कार्डसहित रातो कार्ड पाएर मैदानबाट बाहिरिदा किर्गिस्तान १० खेलाडीमा समेटिएको थियो ।
बराबरीसँगै नेपालले फाइनल पुग्ने सम्भावना कायम राखेको छ । किर्गिस्तानको पनि फाइनल पुग्ने सम्भावना रहेको छ । यस खेलको नतिजाले बंगलादेश भने फाइनल पुगेको छ ।
नेपालले १ खेलमा १ अंक जोडेको छ । किर्गिस्तानले २ खेलमा १ अंक जोडेको छ । बंगलादेशको १ खेलमा ३ अंक रहेको छ । उद्घाटन खेलमा किर्गिस्तान बंगलादेशसँग १–० ले पराजित भएको थियो ।
अब नेपालले दोस्रो खेलमा बंगलादेशसँग खेल्नेछ । नेपाल र बंगलादेशबीचको खेल शनिबार हुनेछ । राउण्ड रोबिनको आधारमा हुने लिगको शीर्ष दुई टिमले फाइनलमा प्रतिस्पर्धा गर्ने छन् । प्रतियोगिताको फाइनल खेल चैत १६ गते आइतबार हुनेछ ।