राजर्षी जनक कपको उपाधी हेटौंडाको पिप्लेले जित्यो

३१ चैत, हेटौंडा । आयोजक बागमती नगरपालिकालाई हराउँदै हेटौंडाको पिप्ले युवा क्लवले सर्लाहीमा सम्पन्न पाँचौ राजर्षी कप फुटबल प्रतियोगिताको उपाधी जितेको छ । 
सोमबार सम्पन्न भएको उपाधी भिडन्तमा निर्धारित समय र टाइब्रेकरमा समेत बराबरी भएपछि पिप्लेले सडनडेथबाट उपाधि जितेको हो । पिप्लेले आयोजकलाई सडनडेथमा ५–४ गोल अन्तरले हराएको हो ।
बिजेता पिप्लेले ट्रफीसहित नगद १० लाख १ हजार रुपैयाँ प्राप्त गर्दा आयोजक टिमले ५ लाख ५ सय रुपैयाँमै चित्त बुझायो । पिप्लेको तर्फबाट सडनडेथमा कप्तान शाहिद, राजेन्द्र रावल, समिराज थोकर, फोफोना र ग्लोरीले गोल गरेका थिए । पिप्लेका विकास लामा, नवीन गुरुङ र सुशील यादवले गोल गर्न सकेनन् । 
यस्तै बागमतीको तर्फबाट ऋतिक खड्का, कर्ण राउत, स्टेफन समीर, बिजय घलानले गोल गरेका थिए । सर्लाहीका पासाङ लामा र रुपक लामाको प्रहार पिप्लेका गोलरक्षक अनिष देउलाले रोक्दा शिव लिम्बुको प्रहार बहिरीएको थियो भने जाजाको प्रहार बारमा लागेर फर्किएको थियो । फाइनल खेलमा पिप्लेका ग्लोरी म्यान अफ द म्याच भए । उनले नगद १० हजारसहित ट्रफी प्राप्त गरे । 
यस्तै प्रतियोगिताको उत्कृष्ट गोलरक्षक बागमतीका अरुण ब्लोन, डिफेन्डर पिप्लेका शाहिद मिडफिल्डर पिप्लेकै राजेन्द्र रावल, सर्वाधिक गोलकर्ता बागमतीका स्टेफन समीर र उत्कृष्ट प्रशिक्षक पिप्लेका सुबिन घिमिरे घोषित भए । उनीहरुले नगद २० हजार रुपैयाँसहित ट्रफी प्राप्त गरे । 
प्रतियोगिताको सर्वोत्कृष्ट खेलाडी बनेका बागमतीका विजय घलानले ५१ हजार रुपैयाँ प्राप्त गर्दा सर्लाही उदयीमान खेलाडी घोषित हुँदै सर्लाहीला गोलरक्षक अरुण ब्लोनले पल्सर मोटरसाइकल प्राप्त गरे ।