एएफसी कप–२०२१ः बेंगलुरुसँग आर्मी फुटबल क्लब पराजित

२ बैशाख, हेटौंडा । एएफसीको क्लब लाईसेन्स प्राप्त गरेपछि पहिलो पटक एएफसी प्रतियोगिता खेलेको नेपालको त्रिभुवन आर्मी फुटबल क्लबले फराकिलो हार व्यहोरेको छ ।
आर्मी फुटबल क्लबले एएफसी कप–२०२१ प्ले अफको दोस्रो चरणमा भारतको बेंगलुरु एफसीसँग फराकिलो हार व्यहोरेको हो । भारतको गोवास्थित जीएमसी स्टेडियममा बुधबार भएको खेलमा आर्मी बेंगलुरुसँग ५–० गोल अन्तरले पराजित भयो ।
बेंगलुरुलाई जित दिलाउन राहुल भेके र सेलिटन सिल्भाले २÷२ गोल गर्दा बेंगलुरुका कप्तान सुनिल क्षेत्रीले एक गोल गरे । पहिलो हाफमा गोलरहित बराबरी खेलेको आर्मीले दोस्रो हाफमा लगातार गोल खाएको हो । 
बेंगलुरुसँगको हारसँगै आर्मीको प्ले अफको अर्को चरणमा पुग्ने सपना सकिएको छ । अब बेंगलुरुले अर्को चरणमा बंगलादेशको अबहानी लिमिटेड र माल्दिभ्सको क्लब इगल्सबीचको विजेतासँग खेल्नेछ ।
पहिलो खेलमा श्रीलंका पुलिस स्पोर्ट्स क्लबलाई ५–१ ले हराएर आर्मीले बेंगलुरुसँगको भेट पक्का गरेको थियो । एएफसीको क्लब लाईसेन्स प्राप्त गरेपछि आर्मीले पहिलो पटक एएफसीको प्रतियोगिता खेलेको हो ।
सहिद स्मारक ’ए’ डिभिजन लिगमा उपविजेता बनेपनि च्याम्पियन मछिन्द्रको लाईसेन्स नहुँदा आर्मीले प्ले अफको मौका पाएको थियो ।