पीएसजीलाई हराउँदै सिटी पहिलोपटक च्याम्पियन्स लिगको फाईनलमा

२२ बैशाख, हेटौंडा । इंग्लीस प्रिमियर लिग क्लब म्यान्चेष्टर सिटी पहिलोपटक च्याम्पियन्स लिग फुटबलको फाईनलमा प्रवेश गरेको छ । फ्रान्सेली क्लब पेरिस सेन्ट जर्मेन (पीएसजी)लाई दोस्रो लेगको खेलमा २–० ले हराउँदै समग्रमा ४–१ को नतिजा सहित सिटी पहिलोपटक फाईनल पुगेको हो । 
दोस्रो लेगमा सिटीलाई जित दिलाउन रियाद महरेजले दुवै गोल गरे । उनले ११ औं र ६३ औं मिनेटमा गोल गरेका हुन् । यसअघि पहिलो लेगमा सिटीले २–१ को अग्रता लिएको थियो । 
सिटी पछिल्लो तीन सिजन च्याम्पियन्स लिग फुटबलको क्वार्टरफाईनलमा पराजित हुदै आएको थियो । सिटीले सन् २०१६ मा सेमिफाईनल खेलेको थियो । सिटीले राम्रो डिफेन्सिभ खेल प्रस्तुत गर्दा यस सिजन मौरिसियो पोचिटिनो नेतृत्वको पीएसजीलाई सेमिफाईनलबाटै घर फर्काएको छ । 
प्रिमियर लिग फुटबलको उपाधिको नजिक रहेको सिटीले कारबाओ कपको उपाधि उचालिसकेको छ । च्याम्पियन्स लिगको उपाधिले सिटीलाई एकै वर्ष तेहरो उपाधिको उपलब्धि दिन सक्नेछ । 
सिटीले उपाधिका लागि चेल्सी र रियल मड्रिडबीचको विजेतासंग प्रतिस्पर्धा गर्नेछ । चेल्सी र रियल मड्रिडले पहिलो लेग १–१ गोलको बराबरीमा खेलेका छन् । दोस्रो लेग चेल्सीको घरेलु मैदान स्टामफोर्ड ब्रिजमा हुनेछ । फाईनल खेल टर्कीको इस्तानबुलमा मे २९ मा हुनेछ ।