इंग्लिस प्रिमियर लिगः नर्विचविरुद्ध सिटीको सानदार जित 

६ भदौ, हेटौंडा । इंग्लिस प्रिमियर लिग फुटबलमा साविक विजेता म्यानचेस्टर सिटीले पहिलो जित निकालेको छ । शनिबार भएको खेलमा नर्विच सिटीलाई ५–० गोल अन्तरले पराजित गर्दै सिटीले पहिलो जित निकालेको हो ।
घरेलु मैदानमा सिटीलाई जित दिलाउन ज्याक ग्रेलिस, एम्रिक लापोर्टे, रहिम स्ट्रर्लिङ र रियाद महरेजले एक एक गोल गरे । सिटीले एक गोल आत्मघाती उपहार पाएको थियो ।
खेलको सातौं मिनेटमा नर्विचका गोलकिपर टिम क्रुलको आत्मघाती गोलबाट सिटीले सुरुवाती अग्रता बनाएको थियो । १५ औं मिनेटमा फेरान टोरेसको गोलले मान्यता पाएन । गोल अघि फउल भएको कारण भीएआरको सहायताबाट उनको गोलले मान्यता नपाएको हो ।
तर,  खेलको २२ औं मिनेटमा ग्रेलिसले गोल गर्दै सिटीको अग्रता २–० को बनाए । ग्रेलिसको यो सिटीका लागि डेब्यु गोल हो । खेलको ६४ औं मिनेटमा लापोर्टेले गोल गर्दै सिटीको अग्रता तेब्बर बनाए ।
७१ औं मिनेटमा स्ट्रर्लिङले गोल गर्दा सिटीको अग्रता ४–० को बन्यो । त्यसपछि खेलको ८४ औं मिनेटमा महरेजले गोल गर्दै सिटीलाई ५–० को जित दिलाए । 
यस जितसँगै सिटीले २ खेलमा ३ अंक जोडेको छ । पहिलो खेलमा सिटी टोटेनहमसँग पराजित भएको थियो । लगातार दोस्रो हार व्यहोरेको नर्विचले अंक जोड्न सकेको छैन ।