पपुवा न्युगिनी विरुद्ध नेपाल १ सय ५१ रनले विजयी

२६ भदौ, हेटौंडा । नेपालले पपुवा न्युगिनी विरुद्धको दुई खेलको एकदिवसीय अन्तराष्ट्रिय सिरिज जितेको छ । शुक्रबार भएको दोस्रो खेलमा पपुवा न्युगिनीलाई १ सय ५१ रनले हराउँदै नेपालले सिरिज २–० ले आफ्नो बनाएको हो ।
पहिलो खेलमा नेपालले पपुवा न्युगिनीलाई २ विकेटले हराएको थियो । 
शुक्रबारको खेलमा नेपालले दिएको २ सय ३४ रनको लक्ष्य पछ्याएको पपुवा न्युगिनीले १९ ओभर १ बलमा अलआउट हुँदै ८२ रनमात्रै बनाउँन सक्यो । ओमानको अल अमिरात क्रिकेट मैदानमा पपुवा न्युगिनीका लागि टोनी उराले सर्वाधिक १९ रन बनाए । 
नेपाली बलर चम्किएको खेलमा पपुवा न्युगिनीका चार्ल्स अमिनीले १६, नोर्मन भानुवाले १२ तथा सेसे बाउले ११ रन बनाए । गौडी टोका १० रनमा आउट हुँदा अन्य ब्याट्सम्यानले दोहोरो अंक जोड्न सकेनन् । पपुवा न्युगिनीलाई सस्तैमा समेट्न नेपालका सन्दीप लामिछाने एक्लैले ६ विकेट लिए । यस्तै सोमपाल कामी, विक्रम सोब र सुशन भारीले १÷१ विकेट लिए ।
यस अघि टस जितेर पहिले ब्याटिङ गरेको नेपालले ४९ ओभर ३ बलमा अलआउट हुँदै २ सय ३३ रन बनाएको थियो । नेपालका लागि रोहित पौडेलले ८६ रनको अर्धशतकीय इनिङ्स खेले । करण केसीले ४२ रन, कप्तान ज्ञानेन्द्र मल्लले ४५ रन, बिनोद भण्डारी १७ रन, कुशल मल्ल १ र सोमपाल कामी ११ रनमा आउट भए । पपुवा न्युगिनीका चाड सोपरले सर्वाधिक ३ विकेट लिए । यस्तै कबुआ मोरिया र नार्मन भनुवाले २÷२ विकेट लिए । चार्ल्स अमिनीले १ विकेट लिए ।
आईसीसी विश्वकप क्रिकेट लिग–२ अन्तर्गत ओमान र अमेरिकासँगको त्रिकोणात्मक एकदिवसीय सिरिज अघि नेपालले पीएनजीसँग सिरिज खेलेको हो । लिग–२ अन्तर्गतको त्रिकोणात्मक एकदिवसीय सिरिजमा नेपालले पहिलो खेल अमेरिकासँग भदौ २८ गते प्रतिस्पर्धा गर्नेछ ।