आईसीसी विश्वकप क्रिकेट लिग–२: नेपाल ओमानसँग पराजित

file photo

३० भदौ, हेटौंडा । आईसीसी विश्वकप क्रिकेट लिग–२ अन्तर्गतको त्रिकोणात्मक एकदिवसीय अन्तराष्ट्रिय सिरिजको दोस्रो खेलमा नेपाल पराजित भएको छ । मंगलबार भएको दोस्रो खेलमा नेपाल घरेलु टोली ओमानसँग ५ विकेटले पराजित भएको हो ।
नेपालले दिएको १ सय ९७ रनको लक्ष्य ओमानले ३१ ओभर १ बलमा मात्र ५ विकेट गुमाएर पूरा गर्यो । ओमानको जितमा जतिन्दर सिंहले १ सय ७ रनको शतकीय पारी खेल्दा मेहमद नदीले ३८, सुरज कुमारले २० रन र आयन खानले १८ रन  बनाए । 
यस्तै सोइब खानले ७ र जिसन मक्सुदले ४ रनको योगदान दिए । नेपालका करण केसी र कुशल मल्लले २÷२ विकेट लिए भने सुशन भारीले १ विकेट लिए ।
यसअघि टस जितेर पहिले ब्याटिङ गरेको नेपालले ४७ ओभर ४ बलमा अलआउट हुँदै १ सय ९६ रन बनाएको थियो । नेपालका लागि ओपनर आसिफ शेखले ९० रनको अर्धशतकीय इनिङ्स खेले । उनले १ सय १२ बलमा ७ चौका र १ छक्का प्रहार गरेका थिए । 
यस्तै कप्तान ज्ञानेन्द्र मल्ल र करण केसीले समान २१÷२१ रन जोडे भने रोहित पौडेल २०, सनिद्प लामिछाने १६, सोमपाल कामी ७ रन, विनोद भण्डारी ६ रन, कुशल मल्ल ४ रन र बिक्रम सोब २ रनमा आउट भए । ओपनर कुशल भुर्तेल सुन्य रनमा पेभेलियन फर्किएका थिए । ओमानका बिलाल खान एक्लैले ४ विकेट लिए भने नेस्टर धाम्बाले २ तथा जिशन मक्सुद र मोहमद नदीमले १÷१ विकेट लिए । 
यससँगै ओमानविरुद्ध नेपाल लगातार तेस्रो खेलमा पराजित भएको छ । लिग–२ अन्तर्गत नै सन् २०२० को फेब्रुअरीमा नेपाल घरेलु मैदानमा ओमानसँग दुई खेलमा पराजित भएको थियो । जारी सिरिजको पहिलो खेलमा भने नेपालले अमेरिकालाई हराएको थियो । सोमबार भएको खेलमा नेपालले अमेरिकालाई ५ विकेटले पराजित गरेको थियो । 
लिग–२ को अंक तालिकामा नेपाल छैटौं स्थानमा रहेको छ। नेपालले ६ खेलमा ६ अंक जोडेको छ । ओमान ११ खेलमा १८ अंक जोडेर शीर्ष स्थानमा रहेको छ । अब नेपालले शुक्रबार अमेरिकासँग आइतबार ओमानसँग दोस्रो खेल खेल्नेछ ।