’ए’ डिभिजन लिगः मनाङ र ब्रिगेड ब्वाइजको विजयी सुरुवात

६ मंसिर, हेटौंडा । सहिद स्मारक ’ए’ डिभिजन लिग फुटबल अन्तर्ग आइतबार भएका खेलहरुमा मनाङ मस्र्याङ्दी र ब्रिगेड ब्वाइज क्लबले विजयी भएका छन् । 
कीर्तिमानी आठ पटकको च्याम्पियन मनाङ मर्स्याङ्दी क्लबले सहिद स्मारक ’ए’ डिभिजन लिगमा विजयी सुरुआत गरेको छ । आइतबार भएको खेलमा जावलाखेल युथ क्लबलाई १–० गोल अन्तरले पराजित गर्दै मनाङले सुखद सुरुआत गरेको हो । मनाङलाई जित दिलाउन दिनेश राजवंशीले निर्णायक गोल गरे । 
त्रिपुरेश्वरस्थित दशरथ रंगशालामा भएको खेलमा दिनेशले खेलको ५६ औं मिनेटमा निर्णायक गोल गरेका हुन् । मनाङका गोलकर्ता दिनेश नै खेलको म्यान अफ दि म्याच घोषित भए । 
यस्तै आइतबार नै भएको पहिलो खेलमा विभागीय टिम एपीएफ एफसीलाई ३–२ गोल अन्तरले पराजित गर्दै ब्रिगेड ब्वाइजले सुखद सुरुआत गरेको हो । दशरथ रंगशालामै भएको खेलमा ब्रिगेडलाई जित दिलाउन दिनेश राईले दुई गोल गरे । सुरज गुरुङको नाममा एक गोल रह्यो । एपीएफका आशिष लामा र बिकी तामाङले एक एक गोल फर्काए । 
प्रतिस्पर्धात्मक बनेको खेलमा सुरुआती अग्रता पनि ब्रिगेडले बनाएको थियो । जितसँगै नयाँ सिजनको पहिलो खेलमा ब्रिगेडले महत्वपूर्ण ३ अंक जोडेको छ । एपीएफले भने हारबाट सिजनको सुरुआत गरेको छ । खेलको म्यान अफ दि म्याच ब्रिगेडका रोशन राना मगर चुनिए । 
लिग अन्तर्गत आज सोमबार दुई खेलहरु हुनेछ । पहिलो खेलमा दुई विभागीय टिम त्रिभुवन आर्मी क्लब र नेपाल पुलिस क्लबबीच प्रतिस्पर्धा हुनेछ । यस्तै दोस्रो खेलमा साविक विजेता मछिन्द्र फुटबल क्लब र न्युरोड टिम (एनआरटी) बीच प्रतिस्पर्धा हुनेछ ।