कमानेमा जारी कांग्रेस नेतृ स्वर्गीय गुरुङ स्मृति फुटबलको उपाधि मुस्कानलाई

८ मंसिर, हेटौंडा । नेपाली कांग्रेस मकवानपुकी नेतृ स्वर्गीय चित्रकुमारी गुरुङको स्मृतिमा हेटौंडा–८ कमानेमा सम्पन्न  नकआउट फुटबल प्रतियोगिताको उपाधि नर्मल मुस्कान टिमले जितेको छ ।
बुधबार सम्पन्न फाइनल खेलमा नर्मल मुस्कानले कमाने युनाइटेडलाई ३–२ गोल अन्तरले पराजित गरेको हो ।
विजेता नर्मल मुस्कानले नगद ३० हजार सहित ट्रफी र मेडल प्राप्त गरेको छ भने उपविजेता कमाने युनाइटेडले नगल  १५ हजार पुरस्कार सहित ट्रफी र मेडल प्राप्त गरेको छ । 
नेपाल लोकतान्त्रिक खेलकुद संघ मकवानपुर र देव नगर टोल विकास संस्थाको संयुक्त आयोजनामा मंसिर १ गतेबाट हेटौंडा –८ कमानेमा स्वर्गीय गुरुङको स्मृतिमा सेभेन ए साइड नकआउट फुटबल प्रतियोगिता भएको थियो । 
नेपाली कांग्रेस हेटौंडा ८ नम्बर सभापति भुपेन्द्र कोइरालाको सभाध्यक्षतामा भएको प्रतियोगिताको समापन कार्यक्रममा नेपाली कांग्रेस बागमती प्रदेश संसदीय दलका नेता ईन्द्रबहादुर बानियाँको प्रमुख आतिथ्यता रहेको थियो । 
समापन कार्यक्रममा नेपाल लोकतान्त्रिक खेलकुद संघ मकवानपुर अध्यक्ष सविन भट्टाचार्य, नेपाली कांग्रेस मकवानपुरका प्रवक्ता प्रदिप कोइराला, मकवानपुरको प्रतिनिधिसभा  क्षेत्र नम्बर १ को ख का सभापति राजेश बानियाँ, खेलकुद विकास समिति मकवानपुर अध्यक्ष सानु लामा, कांग्रेस हेटौंडा नगरका पुर्व सभापति आनन्दराम पराजुली, लोकतान्त्रिक खेलकुद संघ सचिव प्रदिप कँडेल, लगायतको उपस्थिती रहेको थियो । प्रतियोगितामा १२ टिमको सहभागिता रहेको थियो ।