अन्तरपालिका कप फुटबलको फाइनलमा हेटौंडा र थाहा भिड्ने 

२४ मंसिर। हेटौंडा । हेटौंडाको हुप्रचौरमा जारी प्रथम अन्तरपालिका पुरुष फुटबल प्रतियोगिताको उपाधिका लागि हेटौंडा उपमहानगरपालिका र थाहा नगरपालिका भिड्ने भएका छन् । बागमती गाउँपालिकालाई ३–० गोल अन्तरले हराउँदै हेटौंडाले थाहा नगरपालिकासँगको उपाधि भिडन्त पक्का गरेको हो ।  
बिहीबार भएको दोस्रो सेमीफाइनलमा खेलको पहिलो मिनेटमै गोल गर्दै हेटौंडाका विनोद घलानले टिमलाई अग्रता दिलाएका थिए । ६४ औं मिनेटमा घलानले व्यक्तिगत दोस्रो गोल गर्दै हेटौंडाको अग्रता दोब्बर पारे । दोस्रो हाफको अतिरिक्त समयमा मनोज घलानले गोल गर्दै हेटौंडालाई ३–० को जित दिलाएका हुन् । 
यसअघि बुधबार भएको पहिलो सेमीफाइनल खेलबाट भीमफेदी गाउँपालिकालाई २–१ गोलले हराउँदै थाहा नगरपालिकाले फाइनलमा स्थान बनाइसकेको छ । प्रतियोगिताको फाइनल खेल २५ गते शनिबार दिउँसो १ बजेबाट हुने आयोजकले जानकारी दिएको छ । 
प्रतियोगिताको विजेताले नगद २ लाख र उपविजेताले १ लाखसहित ट्रफी मेडल र प्रमाणपत्र प्राप्त गर्नेछ । यस्तै विधागत उत्कृष्ट खेलाडीहरुलाई समेत नगदसहित ट्रफीको व्यवस्था रहेको छ । 
जिल्ला समन्वय समिति मकवानपुरको आयोजना एवम् मकवानपुर जिल्ला खेलकुद विकास समितिको व्यवस्थापनमा सञ्चालन भैरहेको प्रतियोगितामा जिल्लाका १० वटै पालिकाको सहभागिता रहेको थियो ।