आर्मीलाई सातदोबाटोले बराबरीमा रोक्यो, मच्छिन्द्र र संकटाले अंक बाँडे

३ पुस, हेटौंडा । शहिद स्मारक ए डिभिजन लिग अन्तर्गत शुक्रबार भएका दुई खेल बराबरीमा सकिएका छन् । त्रिपुरेश्वर स्थित दशरथ रंगशालामा शुक्रबार भएको दिनको पहिलो खेलमा त्रिभुवन आर्मी फुटबल क्लबले १–१ तथा मच्छिन्द्र क्बल र संकटा क्लबको खेल गोल रहित बराबरी खेल्दै अंक बाँडेका हुन । 
अन्डरडग टोली सातदोबाटो युथ क्लबसँग आर्मीले १–१ गोलको बराबरी खेल्दै आर्मी तालिकाको दोस्रो स्थानमा पुगेको छ । निकै प्रतिस्पर्धात्मक बनेको खेलमा भने विभागीय टोलीको क्लब आर्मीले सुरुआती अग्रता निकालेको थियो । 
१० औं मिनेटमा आर्मीका दिनेश हेन्जनले गोल गर्दै टोलीलाई अग्रता दिलाएका थिए । तर सातदोेबाटोका अजयी मार्टिन्सले १६ औं मिनेटमा गोल गर्दै खेल बराबरीमा अवस्थामा ल्याएका थिए । बराबरीसँगै ५ खेलबाट ९ अंक जोड्दै आर्मी तेस्रो स्थानमा यथावत रहेको छ । बराबरीपछि सातदोबाटो ८ अंकसहित पाँचौ स्थानमा छ । 
यस्तै दिनको दोस्रो खेलमा साविक विजेता मच्छिन्द्र पनि छिमेकी क्लब संकटासँग रोकिन पुगेको छ । बराबरीपछि मछिन्द्रलाई एक कम खेलेको मनाङसँग ३ अंकको अग्रता बनाउने अवसर गुमेको छ । बराबरीसँगै शीर्ष स्थानको मछिन्द्रले तालिकामा ११ अंक जोडेको छ । र दोस्रो स्थानको मनाङसँग एक अंकको अग्रता लिएको छ । संकटा ९ अंक जोड्दै शीर्ष चारमा उक्लिएको छ । 
लिगमा आज शनिवार तीन खेल हुँदैछन् । काठमाडौंमा दुई खेल हुनेछन् भने पोखरामा मनाङले विभागीय टोली नेपाल पुलिस क्लबलाई आतिथ्यता गर्दै छ । दशरथ रंगशालामा च्यासल युथ क्लबले जावलाखेल युथ क्लबसँग प्रतिस्पर्धा गर्दा दोस्रो खेल थ्री स्टार र न्यूरोड टिम (एनआरटी)बीच हुनेछ ।