जिल्ला स्तरीय रनिङशिल्ड भलिवलको उपाधि शहिद सुनिता स्मृति प्रतिष्ठानले जित्यो

१८ पुस, हेटौंडा । मकवानपुरगढी गाउँपालिकाको आर्थिक सयोग एवं आमभञ्ज्याङ युवा क्लबको आयोजनामा भएको जिल्ला स्तरीय रनिङशिल्ड भलिवल प्रतियोगिताको उपाधि थाहा नगरपालिकाको सहिद सुनिता स्मृति प्रतिष्ठानले जितेको छ ।
शनिवार भएको फाइनलमा खेलमा आयोजक आयोजक आमभञ्ज्याङ युवा क्लबलाई सोझो सेटमा हराउँदै प्रतिष्ठानले उपाधि जितेको हो । फाइनलमा प्रतिष्ठानले आयोजक आमभञ्ज्याङ युवा क्लबलाई २५–१७, २५–१६ र २५–१८ को सोझो सेटमा पराजित गरेको हो । 
प्रतियोगिताको उपाधि जितेको प्रतिष्ठानले ६६ हजार ६ सय ६६ रुपैयाँसहित रनिङशिल्ड, मेडल र प्रमाणपत्र पाएको छ । यस्तै उपविजेतामा सिमित भएकोे आयोजकले ३३ हजार ३ सय ३३ रुपैयाँसहित शिल्ड, मेडल र प्रमाण पत्र हात पारेको छ । 
यसैगरी शनिवार बिहान तेस्रो स्थानको लागि भएको खेलमा आग्रा खेल बिकास समितिले हेटौंडाको छाहारी युवा सेवा समाजलाई १९–२०, २५–२०, २५–१६, २१–१९ अंकले पराजित गर्न सफल भएको छ । तेस्रो भएको आग्रा खेल विकास समितिले १५ हजार रुपैयाँ नगदसहित शिल्ड, मेडल र प्रमाणपत्र प्राप्त गरेको छ । छहारीले ५ हजार नगद पायो । 
प्रतियोगितामा विद्यागत तर्फ आग्राका सविन कार्की वेष्ट ब्लकर, प्रतिष्ठानका राजकुमार कर्मचार्य वेष्ट सेटर, आमभञ्याङका आषिश घलान वेष्ट स्पाईकर र प्रतिष्ठानका राजाराम घलान वेष्ट प्लेयर भए । उनीहरुले जनही नगद पाँच हजार नगदसहित ट्रफि पाएका छन् । विजयी टिम र खेलाडीहरुलाई समापन कार्यक्रमका प्रमुख अतिथि मकवानपुरगढी गाउँपालिका अध्यक्ष बिदुर हुमागाईंंले पुरस्कार प्रदान गरेका थिए । 
यस्तै उक्त अवसरमा तत्कालीन आमभञ्ज्याङ गाविसमा भलविल खेलको सुरुवात गरेको भन्दै शम्भु हुमागाईं, अर्जुन हुमागाईं, इन्द्रप्रसाद सञ्जेल, स्वर्गीय लक्ष्मण सञ्जेल परिवारलगायतलाई सम्मान प्रदान गरिएको थियो । यसैगरी प्रतियोगिताका संयोजक इन्द्रप्रसाद सञ्जेलले तत्कालीन राष्ट्रिय भलिबलका मुख्य प्रशिक्षक स्वर्गीय केशवलाल श्रेष्ठको नाममा स्थापना गरेको पत्रकारिता पुरस्कारबाट मकवानपुरका पत्रकार धर्मेन्द्र दाहाल पुरस्कृत भएका छन् ।
समापन कार्यक्रममा भिमफेदी गाउँपालिका अध्यक्ष हिदम लामा, मकवानपुरगढीको वडा नम्बर ५ का अध्यक्ष जीतबहादुर घिमिरे, ३ नम्बर वडाका वडाध्यक्ष भागवत घिमिरे, ४ नम्बर वडाका वडाध्यक्ष रामप्रसाद तिमल्सिना, नेपाली कांग्रेस क्षेत्र नम्बर २ का क्षेत्रीय सचिव बलराम घिमिरेलगायतकाको आतिथ्यता थियो ।