टि–२० विश्वकप खेल्ने नेपालको सपना अधुरै

११ फागुन, हेटौंडा । नेपाल अष्ट्रेलियामा आयोजना हुने आईसीसी पुरुष टी–२० विश्वकप क्रिकेटमा छनोट हुनबाट चुकेको छ छ । विश्वकप छनोट अन्तर्गतको ग्लोबल छनोट ए को सेमिफाइनलमा युएईसँग पराजित भएसँगै नेपाल विश्वकपमा पुग्न असफल भएको हो । 
ओमानको अल अमेरातमा मंगलबार भएको खेलमा नेपाल युएईसँँ ६८ रनले पराजित भयो । युएईले दिएको १ सय ७६ रनको लक्ष्यसहित जवाफी ब्याटिङ गरेको नेपालले १८ ओभर ४ बलमा अलआउट हुँदै १ सय ७ रन बनाउन सक्यो । 
नेपालका लागि दिपेन्द्र सिंह ऐरीले सर्वाधिक ३८ रन बनाए । यस्तै ज्ञानेन्द्र मल्लले २० रन जोड्दा आरिफ शेखले ११ रन जोडे । बाँकि खेलाडीले दोहोरो अंकमा समेत रन बनाउन सकेनन् । युएईका अहमेद राजाले ५ तथा  जुनदे सिद्द्कीले ३ विकेट लिए । 
यस अघि टस जितेर पहिले ब्याटिङ गरेको  युएईले २० ओभरमा ७ विकेट गुमाएर १ सय ७५ रन बनाएको थियो । नेपालका जितेन्द्र मुखिया र अविनाश बोहराले ३÷३ विकेट लिए । कप्तान सन्दीप लामिछानेले १ विकेट लिए ।
नेपालले सन् २०१४ मा बंगलादेशमा आयोजना भएको टी–२० विश्वकप खेलेको थियो । नेपाललाई हराउँदै युएई भने छनोटको फाइनलमा प्रवेश गरेको छ । र, अष्ट्रेलियामा आयोजना हुने विश्वकपमा छनोट भएको छ । युएईले फाइनलमा आयरल्याण्डसँग प्रतिस्पर्धा गर्नेछ ।