बागमती प्रदेश खेलकुद प्रतियोगिता आजबाट सुरु हुँदै 

२८ फागुन, हेटौंडा । प्रथम बागमती प्रदेश खेलकुद प्रतियोगिता आजबाट सुरु हुँदैछ । हेटौंडास्थित पिप्ले क्याम्पा रङ्गशालामा आजबाट सुरु हुने प्रतियोगिता अपराह्न ४ बजे विशेष कार्यक्रमकाबीच औपचारिक उद्घाटन हुनेछ । 
मुख्य मन्त्री राजेन्द्र पाण्डेले ओलम्पिक ट्रर्च ओलम्पियन बैकुण्ठ मानन्धरलाई हस्तान्तर गरेपछि प्रतियोगिता औपचारिक रुपमा सुरु हुनेछ । बागमती प्रदेशका १३ जिल्लाको सहभागिता रहेको प्रतियोगितामा एथलेटिक्स, फुटबल, भलिबल, कराँते, तेक्वान्दो, ब्याडमिन्टन, क्रिकेट र बक्सिङ खेलका १ हजार ८ सय खेलाडीले प्रतिस्पर्धा गर्ने छन् । 
एथलेटिक्सका महिला १ सय १७ पुरुष १ सय ४३, फुटबलमा महिला १ सय ८० पुरुष २ सय ३४ खेलाडी रहेका छन् । भलिबलमा महिला÷पुरुष समान १ सय २२ खेलाडी रहेका छन् । कराँतेका महिला ९१,पुरुष १ सय १६, तेक्वान्दो १ सय १४, पुरुष १ सय २१ खेलाडीहरूले आ–आफ्नो तौल समूहमा प्रतिस्पर्धा गर्ने छन् । 
त्यसैगरी ब्याडमिन्टनमा ४४ महिला, ७२ पुरुष, क्रिकेटमा ४२ महिला र १ सय ६८ पुरुष, बक्सिङमा २८ महिला र ८६ पुरुष खेलाडी रहेका छन् । प्रतियोगिता अन्तर्गतका विभिन्न खेलहरु हेटौंडामा मात्र नभई बागमती प्रदेशका विभिन्न जिल्लामा आयोजना हुनेछन् । यस्तै प्रतियोगिताको उद्घाटन हेटौंडामा हुँदा समापन कार्यक्रम भने आगामी चैत्र १२ गते काभ्रेको धुलिखेलमा हुने छ ।