भारतले बंगलादेशलाई ५० रनले हरायो

९ असार, हेटौंडा । आईसीसी टी-२० विश्वकप क्रिकेटको शनिबार राति खेलिएको ‘सुपर-८’ चरणको खेलमा भारतले बंगलादेशलाई ५० रनले हराएको छ ।
जितसँगै अपराजित भारतले सेमिफाइनल प्रवेशको सम्भावना पनि बलियो बनाएको छ ।
लगातार दोस्रो हारसँगै बंगलादेशको सेमिफाइनलमा पुग्ने सम्भावना भने निकै कमजोर बनेको छ । भारत र बंगलादेश ‘सुपर-८’ चरणको ‘समूह–१’ मा छन् । दुई खेलबाट चार अंक बटुलेको भारत तालिकाको पहिलो स्थानमा उक्लिएको छ ।
एक खेलबाट दुई अंक जोडेको पूर्वविजेता अस्ट्रेलिया तालिकाको दोस्रो स्थानमा छ । एक खेल खेलेको अफगानिस्तान शून्य अंकसहित तालिकाको तेस्रो स्थानमा छ । दुई खेल खेलेको बंगलादेशले पनि हालसम्म अंक बटुल्न सकेको छैन ।
शनिबार रातिको खेलमा टस हारी पहिले ब्याटिङको निम्तो पाएको भारतले निर्धारित २० ओभरमा पाँच विकेट गुमाएर एक सय ९६ रन बनाएको थियो । जवाफी ब्याटिङमा ओर्लिएको बंगलादेशले भने निर्धारित ओभरमा आठ विकेट गुमाएर एक सय ४६ रनमात्र बनाउन सक्यो ।
भारतको जितमा हार्दिक पाण्ड्याले अर्धशतकीय योगदान गरे । उनले केवल २७ बलमा तीन छक्का र चार चौकाको मद्दतले अविजित ५० रन बनाए । ओपनर विराट कोहलीले पनि ३७ रन बनाए । विराटले २८ बलको सामना गरी तीन छक्का र एक चौका हिर्काए । 
कप्तान रोहित शर्माले पनि टोलीको खातामा २३ रन थपे । ओपनरको भूमिकामा ओर्लिएका विराट र रोहितले ३९ रनको साझेदारी गरेका थिए । ऋषभ पन्तले ३६ रन, सूर्यकुमार यादबले ६ रन, शिवम् दुबेले ३४ रन बनाए । बंगलादेशका बलर तान्जिम हसन सकिब र रिसाद होसैनले दुई/दुई विकेट हात पारे । सकिब अह हसनले एक विकेट लिए । 
जवाफी ब्याटिङमा ओर्लिएको बंगलादेशका लागि कप्तान नजमुल होसैन सान्तोले सर्वाधिक ४० रन, ओपनर तानजिद हसनले २९ रन, लिटन दास १३ रन, सकिब अल हसन पनि ११ रन, रिसाद होसैनले २४ रन, महमुदुल्लाहले १३ रन बनाए । 
भारतीय टोलीका बलर कुलदीप यादबले तीन विकेट लिए । जसप्रित बुमराह र अर्शदीप सिंहले दुई/दुई विकेट लिए । हार्दिक पाण्ड्याले पनि एक विकेट हात पारे ।