भेट्रान्स कप: बानेश्वर, फ्रिडम फाईटर र किङकम सेमिफाइनल प्रवेश

२४ फागुन, हेटौंडा । हेटौडामा जारी दशौं राष्ट्रिय हेटौडा भेट्रान्स कप एट ए साइड रनिङ शिल्ड फुटबल प्रतियोगिता अन्तर्गत शनिवार चार क्वाटर फाइनल खेल सम्पन्न भएका छन् । 
हेटौँडा भेट्रान्स क्लबको आयोजनामा हेटौडा ४ मा रहेको हुप्राचौर खेलमैदानमा जारी प्रतियोगिता अन्तर्गत शनिवारको पहिलो खेलमा बानेश्वर भेट्रान्सले एबिसी भेट्रान्स पोखरालाई टाईब्रेकरमा पराजित गर्न सफल हुँदै सेमिफाइनल प्रवेश गरेको छ । निर्धारित समयमा दुवै समूहबाट गोल हुन नसकेपछि खेल टाईब्रेकरमा पुगेको थियो । टाईब्रेकरमा ३-२ गोलले बानेश्वर भेट्रान्स विजयी भएको हो । खेलको म्यान अफ द म्याच बानेस्वर भेट्रान्सका खेलाडी राजनलाल नेपाली घोषित भएका थिए । 
यस्तै आजै भएको दोस्रो क्वाटरफाईलन खेलमा किङकम भेट्रान्स विजयी भएको छ । किङकम भेट्रान्सले बगर भाईखलक भेट्रान्सलाई ३-० गोल अन्तरमा पराजित गर्दै सेमिफाइनल प्रवेश गरेको छ । खेलमा किङकम भेट्रान्सको तर्फबाट खेलको २० औं मिनेटमा सञ्जय रानाले एक गोल गरेका थिए भने खेलको ४१ र ४८ औं मिनेटमा सरोज थापाले दुई गोल गर्दै समूहलाई विजयी बनाएका थिए । खेलमा म्यान अफ द म्याच थापा घोषित भएका थिए ।
तेस्रो क्वाटर फाइनल खेलमा नागस्वती भेट्रान्सलाई २-० दुई शून्य गोलले पराजित गर्दै फ्रिडम फाइटर भेट्रान्स विजयी भएको छ । फ्रिडमको तर्फबाट खेलको १३ औं मिनेटमा कृष्ण मालाकारले एक गोल गरेका थिए भने ४१ औं मिनेटमा तेज बहादुर गलामीले एक गोल गर्दै समूहलाई सेमिफाइनल प्रवेश गराउन सफल भएका थिए । खेलको म्यान अफ द म्याच फ्रिडम भेट्रान्सका तेज बहादुर गलामी घोषित भएका थिए । 
आजको चौथो क्वाटर फाइनल खेलमा बौद्ध भेट्रान्स र हेटौडा भेट्रान्स बराबरीमा टुङ्गिएको छ । निर्धारित समयमा दुवै समूहबाट १-१ गोल भएपछि खेल टाईब्रेकरमा पुगेको थियो । समय अभावका कारण यी दुई समूहबिचको टाएब्रेकर आइतबार बिहान साढे ८ बजे हुने प्रतियोगिता संयोजक मणिराज गौतमले बताए। 
आइतबार दिउँसो २ बजे बानेश्वर भेट्रान्स र फ्रिडम फाइटरबीच पहिलो सेमिफाइनल खेल हुनेछ भने दोस्रो सेमिफाइनल खेल किङकम भेट्रान्स काठमाडौंले हेटौडा र बौद्ध भेट्रान्सबीचको विजयी टिमसँग खेल्ने छ ।